F1/ Po afrohet Çmimi i Madh i Australisë, nga Hamilton te Verstappen, flasin protagonistët

Nga Anila Zyberaj Përditësimi i fundit 13 Mars 2025, 13:37

Numërimi mbrapsht po përfundon: po afrohet Çmimi i Madh i Australisë, gara e parë e Kampionatit Botëror të Formula 1 për sezonin 2025 dhe gjithashtu debutimi zyrtar i Lewis Hamilton me Ferrarin.

"Nuk ndiej presion," – tha britaniku në konferencën për shtyp. "E di që mund të sjell rezultate: thjesht duhet të ulim kokën dhe të punojmë."

Ndërkohë, Max Verstappen paralajmëron: "Makina Red Bull nuk është më e shpejta për momentin, por besoj se jemi në një fazë pozitive."

Një debutim i shumëpritur

Kurioziteti për garën e parë të sezonit është trefishuar këtë vit, pasi në Melbourne, në hapjen e sezonit 2025, Lewis Hamilton do të debutojë me Ferrarin.

Pas pritjeve të mëdha, prezantimeve dhe xhirove të para, tani është koha për të garuar seriozisht.

Pa dyshim që do të ketë presion mbi britanikun, por ai duket se është plotësisht i përgatitur psikologjikisht:

"Gjatë viteve, presioni që i kam vendosur vetes ka qenë 10 herë më i madh se ai që më kanë vendosur të tjerët. Nuk kam ardhur në Ferrari për të ndjerë presionin, por sepse e di çfarë mund të sjell dhe si ta bëj.

Gjithçka ka të bëjë me përkushtimin dhe punën. Po e nis këtë fundjavë me një mendje të hapur."

Ai shtoi: "Nuk them që do të jetë e lehtë, por presionin nuk e ndiej: ai i jashtëm nuk ekziston, ai i vërtetë vjen nga brenda dhe nga ajo që unë dua të arrij. Nuk jam këtu për të provuar diçka."

Ky është një moment pozitiv për Hamilton, i cili reflektoi mbi karrierën e tij:

"Jam shumë, shumë me fat që kam pasur një karrierë të tillë në Formula 1. Fillova këtu në 2007, një përvojë epike, ashtu siç ishte speciale të garoja për Mercedesin.

Më kujtohet kur e shihja garazhin e Ferrarit nga paddock-u – tani jam vërtet këtu. Është një ndjenjë fantastike."

Edhe Max Verstappen, kampion në fuqi i botës, ka pritshmëri të mëdha:

"Jemi në një formë pozitive, mendoj. Do të mësojmë më shumë këtë fundjavë dhe më pas. Po përpiqemi të bëjmë më të mirën tonë, për momentin nuk kemi çfarë të bëjmë më shumë.

Nuk kemi pasur shumë ditë testimi, kemi identifikuar disa fusha ku duhet të përmirësohemi dhe do të vazhdojmë të punojmë për këtë.

Kam parë një përmirësim, por mund të bëjmë më shumë. E di që nuk jemi më të shpejtët tani, por përsëris: sezoni do të jetë i gjatë.

Ai e mbylli me një reflektim mbi ndryshimet në F1:

"Nëse do të më kishit bërë këtë pyetje në fund të sezonit të kaluar, përgjigja ime do të kishte qenë ndryshe. Kjo tregon sa shpejt mund të ndryshojnë gjërat në Formula 1.

Do të bëjmë më të mirën tonë për të qenë sa më konkurrues."

Në konferencë foli edhe pasardhësi i Lewis Hamilton te Mercedes, Kimi Antonelli. Fjalët e tij të para ishin për britanikun:

"Para së gjithash, është surreale të garosh kundër dikujt si Lewis. U rrita duke e parë atë, dhe tani që jam në Mercedes, e ndjek edhe më shumë.

Është një pilot i jashtëzakonshëm dhe është e çuditshme ta ndaj pistën me të dhe me pilotë të tjerë.

"E sheh atë në televizor dhe pastaj garon kundër tij – është një ndjenjë e pabesueshme. Lewis ka qenë shumë i sjellshëm me mua, më ka dhënë disa këshilla.

Ai nuk është vetëm një pilot i madh, por edhe një person i madh."