Turqia drejt marrëveshjes së mbrojtjes prej 6 miliardë dollarësh me Arabinë Saudite
Nga OraNews Përditësimi i fundit 29 Janar 2025, 22:35
Turqia është në bisedime për të finalizuar një marrëveshje të mbrojtjes me vlerë 6 miliardë dollarë me Arabinë Saudite, e cila mund ta përfshijë këtë të fundit në programin e aeroplanëve luftarakë turq.
Marrëveshja pritet të konkretizohet gjatë një vizite të mundshme të presidentit Recep Tayyip Erdogan në Riad në mars, raportojnë mediat ndërkombëtare.
Arabia Saudite, një nga importuesit më të mëdhenj të armëve në botë, është një treg strategjik për industrinë e mbrojtjes turke, e cila po zgjerohet me shpejtësi.
Në vitin 2023, Riad nënshkroi një kontratë historike me kompaninë turke Baykar për blerjen e dronëve të avancuar, marrëveshja më e madhe e mbrojtjes në historinë e Turqisë.
Marrëveshja e re synon të zgjerojë bashkëpunimin për të përfshirë tankun kryesor të betejës Altay dhe sistemet e mbrojtjes raketore.
Gjithashtu, Turqia dëshiron që Arabia Saudite të bëhet partnere në programin e aeroplanit luftarak Kaan, i cili kreu me sukses fluturimin e parë testues vitin e kaluar, por ende ndodhet në fazën e zhvillimit.
Programi Kaan ka tërhequr interes të gjerë ndërkombëtar, me përfshirjen e kompanisë britanike BAE Systems dhe mundësinë e angazhimit të vendeve të tjera në të ardhmen.
Industria e mbrojtjes e Turqisë ka njohur një rritje të ndjeshme, me eksportet që u rritën me afro 30% në vitin 2024, duke arritur një rekord të ri prej 7.2 miliardë dollarësh, sipas të dhënave zyrtare.
