Ish-Presidenti i SHBA-së, Bill Clinton shtrohet në spital me ethe
Nga OraNews Përditësimi i fundit 24 Dhjetor 2024, 18:01
Ish-presidenti amerikan Bill Clinton u shtrua të hënën në Spitalin Universitar ‘MedStar Georgetown’ në Uashington pasi pati ethe.
Ish Presidenti, 78-vjeç, u shtrua në spital “pasdite për të kryer disa teste dhe për ta mbajtur nën vëzhgim”, tha në një deklaratë Angel Urena, zëvendës shef i kabinetit të zotit Clinton.
“Ai mbetet në gjendje të mirë dhe e vlerëson thellësisht kujdesin e shkëlqyer që po merr”, tha zoti Urena.
Politikani nga Partia Demokrate që ka shërbyer si President për dy mandate nga janari i vitit 1993 deri në janarin e vitit 2001, gjatë verës mbajti fjalim në Kongresin Kombëtar të partisë në Çikago.
Ai gjithashtu bëri fushatë për kandidaten demokrate për President Kamala Harris për zgjedhjet e 5 nëntorit.
Përgjatë viteve, pasi përfundoi detyrën si President, zoti Clinton është përballur me disa probleme shëndetësore.
Në vitin 2004 iu nënshtrua një operacioni në zemër pasi përjetoi dhimbje në gjoks dhe probleme në frymëmarrje.
Zoti Clinton u shtrua sërish në spital për një ndërhyrje në mushkëri në vitin 2005, ndërsa në vitin 2010 ai pati një operacion tjetër ku iu vendosën tuba për të mbajtur hapur arteriet e zemrës.
Ish Presidenti Clinton vendosi më pas t’i përmbahet një diete kryesisht vegane që rezultoi me humbje në peshë dhe përmirësim të shëndetit.
Në vitin 2021 ish Presidenti qëndroi në spital për gjashtë ditë në Kaliforni pasi u trajtua për një infeksion që nuk kishte të bënte me COVID19, pavarësisht se pandemia globale ishte ende në pikun e saj.
Një këshilltar i ish-Presidentit tha atëherë se zoti Clinton kishte një infeksion të traktit urinar që iu përhap në gjak, por ishte në shërim dhe se nuk iu rrezikua jeta.
Këshilltari tha se ish Presidenti Clinton, ishte në një repart të kujdesit intensiv të spitalit atë kohë, por nuk po merrte trajtim si pacient i terapisë intensive./VOA
