Kryeministri libanez viziton postet e ushtrisë në jug pas armëpushimit Izrael-Hezbollah
Nga OraNews Përditësimi i fundit 23 Dhjetor 2024, 17:14
Kryeministri i përkohshëm libanez, Najib Mikati vizitoi sot postet ushtarake në jug të vendit – për herë të parë që nga hyrja në fuqi e armëpushimit midis Hezbollahut dhe Izraelit, muajin e kaluar.
“Ne kemi shumë punë përpara”, tha Mikati, sipas Agjencisë Kombëtare të Lajmeve (NNA). “Pika më e rëndësishme është tërheqja e trupave izraelite nga Libani jugor”, shtoi ai. Izraeli dhe milicia e Hezbollahut e mbështetur nga Irani ranë dakord për një armëpushim në fund të nëntorit.
Marrëveshja parashikon, ndër të tjera, që trupat tokësore izraelite të tërhiqen nga Libani në disa faza brenda 60 ditëve. Në përputhje me Rezolutën 1701 të OKB-së, Hezbollahu do të tërhiqet prapa lumit Litani, rreth 30 kilometra në veri të kufirit izraelito-libanez.
Ushtria libaneze do të monitorojë respektimin e marrëveshjes. Që nga hyrja në fuqi e armëpushimit, ka pasur shkelje të përsëritura si nga Izraeli ashtu edhe nga milicia e Hezbollahut, duke rezultuar në disa vdekje.
“Libani po përballet me një provë të vështirë”, tha Mikati pas një takimi me shefin e ushtrisë, Joseph Aoun në qytetin Marjayoun, pranë kufirit izraelit.
Megjithatë, Mikati tha se kishte besim të plotë tek ushtria libaneze, e cila do të dëshmonte se ishte në gjendje të përmbushte të gjitha detyrat që i kërkoheshin.
