Biden: Aleanca Seul-Uashington shtylla e paqes në Azi-Paqësor
Nga OraNews Përditësimi i fundit 15 Dhjetor 2024, 10:02
Aleanca midis Seulit dhe Uashingtonit do të mbetet shtylla e paqes dhe prosperitetit në rajonin e Azi-Paqësorit, i tha presidenti amerikan Joe Biden kryeministrit të Koresë së Jugut dhe presidentit të përkohshëm, Han Duck-soo.
Ky ishte shkëmbimi i parë mes Biden dhe Han që kur ky i fundit mori postin e presidentit të përkohshëm.
Yoon Suk Yeol u shkarkua dje nga parlamenti, pas përpjekjes së tij të dështuar për të vendosur ligjin e luftës dhe për të bllokuar parlamentin nga ushtria më 3 dhjetor.
“Presidenti Biden shprehu vlerësimin e tij për qëndrueshmërinë e demokracisë dhe shtetit të së drejtës në Republikën e Koresë”, tha Shtëpia e Bardhë në një deklaratë.
“Të dy liderët diskutuan përparimin e konsiderueshëm të bërë në vitet e fundit në forcimin e aleancës midis Shteteve të Bashkuara dhe Republikës së Koresë dhe presidenti Biden shprehu besimin se aleanca do të mbetet shtylla e paqes dhe prosperitetit në rajonin e Indo-Paqësorit”, shtoi ajo.
Grushti i shtetit më 3 dhjetor i befasoi Shtetet e Bashkuara, aleatja kryesore e Koresë së Jugut. Këshilltari i Sigurisë Kombëtare i Shtëpisë së Bardhë, Jake Sullivan, tha se qeveria amerikane nuk ishte e informuar paraprakisht dhe e mori vesh lajmin përmes televizionit.
Gjatë dy viteve e gjysmë në krye të Koresë së Jugut, Yoon Suk Yeol vizitoi Shtetet e Bashkuara pesë herë dhe punoi për të forcuar aleancën me Uashingtonin, vendimtar përballë kërcënimit ushtarak të Koresë së Veriut. Rreth 28 500 trupa amerikane janë të vendosura në Korenë e Jugut.
