Ish-prokurorja e Manhatanit do të përfaqësojë të dyshuarin për vrasjen e CEO-s së UnitedHealthcare
Nga OraNews Përditësimi i fundit 14 Dhjetor 2024, 19:02
I dyshuari për vrasjen e shefit ekzekutiv të UnitedHealthcare ka marrë një avokat të shquar mbrojtës në ekipin e tij ligjor, ndërsa prokurorët e Manhatanit po punojnë për ta kthyer atë nga Pensilvania për t'u përballur me një akuzë për vrasje.
Luigi Mamngione do të përfaqësohet nga Karen Friedman Agnifilo, e cila ishte një deputete e rangut të lartë në zyrën e prokurorit të qarkut Manhattan për vite, përpara se të hynte në praktikën private.
Firma ligjore e Friedman Agnifilo, Agnifilo Intrater LLP, konfirmoi në një deklaratë të premten vonë se ajo do të përfaqësonte Mangione. Firma tha se ajo nuk do të komentojë për rastin në këtë moment.
Mangione u arrestua të hënën, pasi një klient në një dyqan McDonald’s në Altoona, Pensilvani, e pa atë duke ngrënë mëngjes dhe vuri re një ngjashmëri me personin që kërkohej nga policia në vrasjen e Brian Thompson, më 4 dhjetor në Manhatan.
Policia thotë se Mangione u gjet me një armë, maskë dhe shkrime, që e lidhnin atë me pritën jashtë Hilton Midtoën të Nju Jorkut, ku Thompson po mbërrinte për konferencën vjetore të investitorëve të kompanisë së tij.
Mangione, 26 vjeç, mbeti i burgosur pa lirim me kusht të shtunën në Pensilvani, ku fillimisht u akuzua për armëmbajtje dhe falsifikim. Altoona është rreth 230 milje (rreth 370 kilometra) në perëndim të qytetit të Nju Jorkut.
Avokati i Mangione atje, Thomas Dickey, ka paralajmëruar mos paragjykimin e çështjes dhe tha se klienti i tij do të kundërshtonte ekstradimin e tij në Nju Jork.
Por Prokurori i Qarkut të Manhatanit, Alvin Bragg, tha të premten se kishte indikacione se Mangione, tani mund të heqë dorë nga ajo luftë.
"Ne do të vazhdojmë të ecim përpara në rrugë paralele dhe do të jemi gati, nëse ai do të heqë dorë nga ekstradimi ose nëse do të kundërshtojë ekstradimin," tha Bragg në një konferencë shtypi në Times Square.
Disa orë pas arrestimit të Mangione të hënën, zyra e Bragg paraqiti dokumentet duke e akuzuar atë me pesë akuza, duke përfshirë vrasjen e qëllimshme, mbajtjen kriminale të një arme dhe posedimin kriminal të një instrumenti të falsifikuar.
Guvernatori i Nju Jorkut, Kathy Hochul ka thënë se është e gatshme t'i kërkojë homologut të saj të Pensilvanisë, guvernatorit Josh Shapiro, të ndërhyjë dhe të lëshojë një urdhër guvernator që kërkon ekstradimin e Mangione, nëse ai nuk pranon të zhvendoset vullnetarisht.
Avokatja e re ei Mangione, Karen Friedman Agnifilo, ishte Ndihmës Kryeprokurore e Qarkut nga viti 2014 deri më 2021 dhe më parë ishte shefe e seksionit të gjyqit të zyrës.
Ajo ka bërë paraqitje të shpeshta televizive, duke përfshirë si analiste ligjore në CNN, bashkë-prezantuese e një podcast javor dhe është këshilltare ligjore për "Law & Order".
Bashkëshorti i saj dhe partneri ligjor Mark Agnifilo, përfaqëson Sean ‘Diddy’ Combs në çështjen federale të trafikimit seksual të manjatit të hip-hop-it në Manhattan.
