VIDEO/ Presidenca kërkon shtesë në buxhet, Bardhi e ironizon Begajn: Shpresojmë mos të kërkojë sallon bukurie
Nga OraNews Përditësimi i fundit 13 Nëntor 2024, 14:19
Sekretarja e Përgjithshme e Presidencës, Valbona Lusha paraqiti sot para anëtarëve të komisionit të Ligjeve, kërkesat e këtij institucioni në kuadër të projektbuxhetit 2025.
Fillimisht Lusha detajoi para anëtarëve të komisionit realizimin e fondeve buxhetore për vitin 2024.
Për vitin 2025, ajo u shpreh se buxheti parashikon investime në pajisje dhe orendi të cilat do të jenë të domosdoshme pas rikonstruksionit të godinës ekzistuese të Presidencës.
Valbona Lusha sot në Kuvend
Një zë të veçantë në këtë projektbuxhet, sipas saj, zënë edhe investimet për pajisje kompjuterike. “Vend të veçantë në buxhet ka përfundimi i rikonstruksionit të godinës ekzistuese të Presidencës”, tha ajo.
Lusha solli në vëmendje dhe gjendjen e amortizuar në të cilat ndodhet flota e makinave të presidencës, ndërsa kërkoi një fond shtesë prej 36 milionë lekësh për makina.
“Për shkak të amortizimit, gjendjes teknike, kostos së mirëmbajtjes është e nevojshme blerja e automjeteve për një performancë më të lartë. Ndaj mendojmë se institucioni duhet të mbështetet me fondet e kërkuara për blerjen e makinave”, tha ajo.
Kryetari i Grupit Parlamentar të PD-së, Gazment Bardhi, akuzoi ashpër presidentin, duke theksuar se, në vend që të ngrihet në lartësinë e detyrës, ai vjen në Kuvend dhe kërkon para për kolltuk dhe makina luksi.
Bardhi tha se opozita respekton institucionin e presidentit, por kurrsesi nuk mund të anashkalohet fakti se ai është kthyer në "drejtues politik i fushatës së Edi Ramës". Gazment Bardhi i kërkoi mazhorancës të mos e keqpërdorë presidentin si leckë.
"Presidenti është në detyrë për rehati. Kërkon makina komode, kërkon zyra të mëdha, çfarë nuk kërkon. Shpresojmë të mos kërkojë të hapë ndonjë sallon bukurie në Presidencë. I kemi dhënë fonde në vazhdimësi. Por kam qenë shpesh në Presidencë dhe, për ta thënë të drejtën, godina është mirë. Ky është presidenti i parë që kërkon kolltuk, automjete, e ku di unë.
Presidenti, para se të kërkojë kolltuk, karrige, parukeri, do të duhej të luante rolin si president i vendit. I është dhënë disa herë shansi të ngrihet në detyrën e kreut të shtetit, por nuk ka guxuar kurrë ta bëjë këtë. Ne e inkurajojmë të mos japë mesazh të ndasisë politike. I kërkojmë si institucion përgjegjës të marrë masa për ambasadorët.
Presidenti shkarkoi një nga ambasadorët më të mirë që kemi pasur, ambasadorin në Gjermani. E shkarkoi pse nuk i vuri në dispozicion eskortën për të takuar fëmijët. Nuk merr asnjë masë për ambasadorët që shkojnë në takime politike. Në vend që të flasë për këtë, vjen e kërkon në Kuvend, kolltuk.
Sot nuk ka para për të sëmurët me kancer, por presidenti mori para për dorën që vrau, duke kërcënuar ambasadorin në Gjermani. Do duhet ta dinë shqiptarët këtë. Nëse keni respekt për presidentin, mos e përdorni si leckë", akuzoi Gazment Bardhi.
NDIQNI DISKUTIMIN E PLOTE NE KOMISION
