Spiropali, bashkëbisedoi me nxënës të shkollës “Kosova” në Punishten e Demokracisë së Kuvendit
Nga OraNews Përditësimi i fundit 2 Tetor 2024, 13:37
Kryetarja e Kuvendit, znj. Elisa Spiropali, u bashkua sot për një bashkëbisedim me nxënës të shkollës “Kosova” të Tiranës në Punishten e Demokracisë së Kuvendit. Bashkëbisedimi u përqendrua rreth çështjeve të demokracisë, qytetarisë aktive, dhe funksioneve të Kuvendit të Shqipërisë.
"Punishtja e Demokracisë" është një program i Kuvendit të Shqipërisë, dedikuar fëmijëve i cili synon të promovojë vlerat dhe parimet e qeverisjes demokratike përmes aktiviteteve dhe informacionit të përshtatshëm për moshën e tyre.
Shërbimi i Edukimit Qytetar në Kuvendin e Shqipërisë, ofron mundësi dhe programe të përgatitura me kujdes për grupmosha të ndryshme, me qëllim nxitjen e pjesëmarrjes aktive si dhe angazhimin e fëmijëve dhe të rinjve, duke i fuqizuar ata të diskutojnë dhe pyesin përfaqësuesit e tyre të zgjedhur.
Kuvendi i Shqipërisë me këto programe kërkon të edukojë përmes debateve dhe bisedave konstruktive, të zhvillojë ndjenjën e aktivizmit, të nxisë llogaridhënien si dhe të informojë nxënësit dhe të rinjtë mbi historikun, funksionet e Kuvendit dhe veprimtarinë parlamentare për grupmosha të ndryshme.
Në dy vitet e fundit, interesimi dhe pjesëmarrja e nxënësve dhe të rinjve në këto programe është rritur ndjeshëm, rreth 12.588 vizitorë dhe pjesëmarrës aktivë të grupmoshave të ndryshme.
Turi parlamentar: 4.860 pjesëmarrës;
Punishtja e Demokracisë: 3.175 pjesëmarrës;
Këndvështrimi im: 1.019 pjesëmarrës;
Fjala ime për…: 868 pjesëmarrës; Kuvend-ON: 361 pjesëmarrës;
Ditë të hapura: 2.305 vizitorë.
