Goditje e dyfishtë, Laçi prezanton ish-sulmuesin e Shqipërisë U21
Nga OraNews Përditësimi i fundit 10 Gusht 2024, 16:13
Laçi ka zyrtarizuar dy afrime. Pas Kleandro Lleshit, Emiliano Bullari dhe Samuel Opeh janë dy përforcimet e radhës për skuadrën e drejtuar nga Armando Cungu.
I pari aktivizohet si sulmues, teksa më parë ka veshur fanellën e ekipit kombëtar U21 të Shqipërisë. Duke realizuar 3 gola në 6 takime me Shpresat.
23-vjeçari i dalë nga akademia e Olympiacosit, është grumbulluar edhe me kombëtaren A të Shqipërisë, por pa mundur të debutojë.
Bullari ishte pjesë e AO Egaleos në Greqi në fazën e dytë të sezonit të fundit, teksa tashmë do të provojë për herë të parë Superioren me bardhezinjtë kurbinas.
Klubi verior ka zyrtarizuar edhe Opeh, qendërmbrojtësin nigerian, sigurimi i shërbimeve të të cilit ishte njoftuar ditë më parë.
25-vjeçari, dikur pjesë e Nigerisë U17, përveçse në vendlindje është aktivizuar edhe në Uzbekistan. Tani zbarkon në Shqipëri për të forcuar prapavijën e Laçit.
Skuadra e Cungut do të zhvillojë sot miqësoren e radhës në prag të nisjes së sezonit 2024/2025 në Superiore.
Kurbinsit do të presin në shtëpi Vllazninë e Thomas Brdaric, me sfidën që do të fillojë prej orës 17:30.
