Ukraina ka armë taktike bërthamore, thotë televizioni shtetëror rus

Nga OraNews Përditësimi i fundit 6 Gusht 2024, 15:54

Sugjerimi i paevidentuar u dha nga Alexei Mukhin, kreu i Qendrës për Informacionin Politik, një grup ekspertësh pro-Kremlinit, në kanalin televiziv shtetëror Russia-1. Ai tha se beson se dorëzimi i avionëve luftarakë F-16 të prodhuar nga SHBA në Ukrainë, për të cilin presidenti ukrainas Volodymyr Zelensky kishte lobuar prej kohësh, tregon se armët taktike bërthamore tashmë janë dorëzuar në vendin e shkatërruar nga lufta.

Nuk ka asnjë provë që sugjeron se ukrainasve u janë dërguar armë bërthamore nga Perëndimi. Newsweek ka kontaktuar Ministrinë e Jashtme të Ukrainës për koment me email.

Zelensky konfirmoi të dielën mbërritjen e F-16 në vendin e tij, më shumë se dy vjet pas luftës së nisur nga presidenti rus Vladimir Putin.

"Së pari, F-16 janë tashmë atje dhe jam i sigurt se armët bërthamore taktike janë tashmë atje. Fatkeqësisht, praktika tregon se kur ata shpallin diçka, kjo ndodhi disa muaj më parë," tha Mukhin, raportoi të martën faqja hetimore ruse Agentstvo.

Ukraina nuk ka pasur armë bërthamore që kur hoqi dorë nga arsenali i saj bërthamor në këmbim të garancive të sigurisë nga Rusia dhe SHBA si pjesë e memorandumit të Budapestit. Përkundër kësaj, mediat dhe zyrtarët pro-Kremlinit kanë përhapur disa herë narrativën e armëve bërthamore që kur Rusia nisi pushtimin e saj në shkurt 2022.

Një tjetër i ftuar në emision, Konstantin Zatulin, një anëtar i partisë në pushtet të vendit Rusia e Bashkuar, nuk u pajtua me Mukhin-in.

"Ata po përpiqen të na kapin nga gjuha, pasi tashmë kemi arritur të themi se shfaqja e F-16 do ta perceptojmë si një kërcënim bërthamor... Por jam i sigurt se ata me siguri nuk e kanë kaluar pragun lidhur me sigurimin e armëve bërthamore taktike", tha Zatulin.

Kremlini është zotuar se do të rrëzojë avionët luftarakë të Ukrainës, F-16, të furnizuar nga Perëndimi, ndërsa njëkohësisht ka pohuar se nuk beson se ata do ta kthejnë drejtimin e luftës.

Ndërkohë, Rusia ka kryer stërvitje me armë bërthamore për javë të tëra, duke thënë se po e bën këtë sepse u shkaktua nga deklaratat provokuese dhe kërcënimet nga vendet perëndimore që mbështesin Ukrainën.

Ministria ruse e Mbrojtjes njoftoi më 31 korrik se kishte nisur fazën e tretë të stërvitjeve të saj taktike të armëve bërthamore, e cila filloi në maj.

Faza e parë përfshinte "testimin praktik të përgatitjes dhe përdorimit të armëve bërthamore jostrategjike" në Qarkun Ushtarak Jugor të vendit dhe faza e dytë filloi në qershor së bashku me trupat bjelloruse.

Faza e tretë e stërvitjeve të Putinit përfshin rrethet ushtarake jugore dhe qendrore të Rusisë dhe synojnë "përgatitjen e njësive të Forcave të Armatosura të Federatës Ruse për përdorimin luftarak të armëve bërthamore jostrategjike", tha ministria.