EURO2024/ "El Mundo": Finalja e fëmijëve
Nga OraNews Përditësimi i fundit 10 Korrik 2024, 14:10
Mbërritja e kombëtares spanjolle të futbollit në finalen e Kampionatit Evropian është tema e ditës në të gjitha faqet e para të gazetave kryesore iberike.
Titujt festojnë arritjen e ”Roja”-s dhe në veçanti protagonistëve të saj më të vegjël.
“Finalja e fëmijëve”, titullon gazeta e njohur spanjolle ”El Mundo”.
Ndër të gjithë spikat 16-vjeçari Lamine Yamal, shënues i njërit prej dy golave vendimtarë në fitoren 2-1 në gjysmëfinale ndaj Francës mbrëmjen e djeshme dhe i zgjedhur si fytyra simbolike e momentit edhe për historinë e tij personale.
Një yll në rritje për Barcelonën, Yamal u lind në Katalonjë nga prindër emigrantë.
Babai i tij është me origjinë marokene dhe nëna e tij është nga Guinea Ekuatoriale.
Siç thekson ”Vanguardia”, dje lojtari festoi golin e tij me një gjest të veçantë: ai tregoi numrat 304, kodin postar të lagjes popullore dhe multietnike të qytetit Mataró ku u rrit.
Paralelisht, mediat iberike trajtojnë edhe temën e debatit politik për menaxhimin e pritjes së të miturve emigrantë të pashoqëruar, temë kjo që do të jetë në qendër të ditës së sotme në një takim mes qeverisë dhe bashkive.
Siç nënvizon një titull nga ”El País”, pranë një fotoje të Yamal, disa qeveri (kryesisht ato në duart e koalicioneve të krahut të djathtë midis Popular dhe Vox) nuk duken të gatshme të pranojnë një marrëveshje për shpërndarjen e detyrueshme të kësaj përgjegjësie.
Ndërkohë, në orët e fundit të gjithë drejtuesit kryesorë politikë të vendit kanë festuar edhe fitoren e Spanjës në Kampionatin Evropian. “Ju keni një vend të tërë pas jush”, shkroi kryeministri Pedro Sánchez në X.
