“Territori i Pastër”, Balla përgëzon policinë: U asgjësuan 7 600 bimë kanabisi
Nga OraNews Përditësimi i fundit 12 Qershor 2024, 13:43
Ministri i Brendshëm Taulant Balla përshëndeti Policinë e Shtetit për rezultatet në luftën kundër kultivimit të bimëve narkotike. Përmes një postimi në rrjete sociale, Balla duke vlerësuar punën e forcave të rendit, thekson se janë proceduar 5 autorë të dyshuar dhe janë asgjësuar mijëra bimë kanabis.
“Vijon intensivisht nga ajri dhe toka, megaoperacioni policor kombëtar i koduar “Territor i pastër”, kundër kultivimit të bimëve narkotike. Përgëzime Policisë së Shtetit Shkodër, Gjirokastër dhe Kukës, për operacionet e fundit, gjatë të cilave u asgjësuan 7600 bimë e fidanë canabisi, u sekuestruan armë zjarri, municion luftarak, si dhe u arrestuan/proceduan pesë shtetas, si autorë të dyshuar.”, theksoi Balla.
Policia e Shtetit njoftoi më herët se ka asgjësuar disa ngastra të mbjella me bimë kanabis të madhësive të ndryshme, teksa procedoi 5 shtetas si autorë të dyshuar duke siguruar edhe provat materiale, bimë kanabisi, armë, municion luftarak dhe prova të tjera me vlerë ligjore.
Gjatë këtij aksioni, forcat e policisë përdorën informacionet e mbledhura në rrugë operative, por edhe teknika speciale të hetimit. Për vendndodhjen e ngastrave të mbjella në terrene të vështira dhe larg vendbanimeve, policia përdori pajisje të ndryshme, përfshirë edhe dronët.
Ky operacion kombëtar i Policisë së Shtetit për zbulimin dhe asgjësimin e bimëve narkotike, vijon në mënyrë intensive me qëllim zhdukjen që në fillesë të çdo tentative për vjeljen e lëndës narkotike.
