Donnarumma: Grup i vështirë në Euro 2024? Ashtu është edhe për të tjerët
Nga OraNews Përditësimi i fundit 1 Qershor 2024, 15:05
Gianluigi Donnarumma përgatit të përjetojë një Europian si kapiten i Italisë.
Në një intervistë të fundit për “Sky Sport”, portieri thekson se shiriti i kapitenit në kombëtare ka shumë përgjegjësi ndërsa komentoi edhe Grupin B ku bën pjesë Shqipëria, Spanja dhe Kroacia.
Gardiani i PSG theksoi se është një grup i vështirë për Italinë, por shtoi se të njëjtën ndjesi kanë edhe kundërshtarët e Italisë.
“Është një grup i vështirë për ne, por edhe për të tjerët.
Kundërshtarët tanë e dinë mirë se do të përballen me një Itali shumë të fortë dhe me ide të qartë.
Do të luajmë çdo ndeshje sikur të ishte e fundit.
Duhet të përgatitemi mirë sepse të gjitha ndeshjet do të jenë të komplikuara.
Shiriti i kapitenit?
Sigurisht është një përgjegjësi e madhe, por jam krenar të mbaj shiritin e kapitenit te kjo kombëtare.
Dua të jap një shembull, për mua është shumë emocionuese të jem kapiteni i Italisë.
Kam pasur shembuj të mirë si Buffon, Bonuçi e Chiellini.
Kam mësuar prej tyre.
Te kjo skuadër ka shumë liderë dhe të gjithë duhet të ndihen si kapitenë.
Kemi gjithçka në favor për të zhvilluar një Europian të madh”, u shpreh Donnarumma.
