Skënder Myrtezani: Po punojnë për riatdhesimin nga SHBA-ja të eshtrave të Nolit, absurde heshtja e Kuvendit të Shqipërisë
Nga Lili Saraçi Përditësimi i fundit 19 Prill 2024, 10:05
Prej 33 vitesh, doktor Skënder Murtezani jeton e punon në New York, SHBA. Me një fokus të jashtëzakonshëm në karrierën e tij në fushën e mjekësisë, z.Murtezani, ka arritur të jetë shumë mirë njëkohësisht edhe një aktivist, atdhetar, duke u angazhuar në shumë çështje social-kulturore dhe politike.
Ndër misionet më të rëndësishme të tij është lobimi dhe puna e bërë për kthimin e eshtrave të atdhetarit Mit’hat Frashëri. Ndërsa tashmë ai dhe drejtues të Vatra Queens po punojnë për një tjetër mision, kthimin e eshtrave të figurës së madhe shqiptare, Fan Noli.
Për “Ora News”, vetë Skënder Myrtezani foli mbi nismën për sjelljen e eshtrave të Nolit në Shqipëri
“Në vitin 2013-të kur u formua dega jonë mendova që kjo të ishte një mendim shumë i rëndomtë, shumë i qëlluar që ne të kemi fondacionin tonë të krijuesve të shtetit origjinal shqiptar të jenë në një vend, pikërisht në atdhe.
Përderisa kemi Gjergj Fishtën, kemi Frashërlinjtë dhe mendoj se është një nismë e madhe ku komuniteti ynë ortodoks të përfaqësohemi me një gjeni siç është Noli.
Dhe mendoj se ai i përket vendit të tij dhe si shumë mendimtarë të tjerë para meje kanë punuar para meje.
Më habit fakti se në dhjetor kemi dorëzuar një dokument në Parlamentin e Shqipërisë dhe më habit fakti për këtë heshtje të çuditshme.
Të them të drejtën as nuk e di dhe as nuk e kuptoj fare këtë heshtje, është një gjë absurde, pa përshkrim.
Në vend që e gjithë Shqipëria të jetë në këmbë dhe ta mirëpresë këtë gjeni të kombit dhe që ka mahnitur botën shqiptare me veprën e tij”, u shpreh Skënder Myrtezani.
