SHBA/ Ushtarja, influencuesja dhe nëna e një vajze 12-vjeçare vetëvritet

Nga OraNews Përditësimi i fundit 22 Janar 2024, 10:38

Një ushtare e ushtrisë amerikane me një llogari të njohur të fitnesit dhe modës në Instagram ka vrarë veten, duke tronditur familjen dhe miqtë e saj.

Rreshterja Michelle Young, 34 vjeç, kreu vetevrasje, duke lënë pas vajzën e saj 12-vjeçare, e cila, sipas miqve të saj, ishte “e gjithë bota e saj”.

“Michelle ishte një shpirt i bukur, një shoqe e mahnitshme, një nënë beqare, një ushtarë dhe dëshmi se nuk e di se çfarë po kalon dikush, apo me çfarë demonësh mund të luftojnë”, shkroi shoqja e saj Sarah Maine në rrjetet sociale.

“Ne kurrë nuk do të mbushim boshllëqet në zemrat tona dhe do të mbetemi gjithmonë me një arsye pa përgjigje.” Young iu bashkua ushtrisë në moshën 18-vjeçare dhe kishte shërbyer për 16 vjet. Gjatë asaj kohe ajo përfundoi dy misione në Afganistan, raportoi Daily Mail.

Pak ditë para se të dilte lajmi për vdekjen e saj, Young kishte postuar në Instagram për ditëlindjen e vajzës së saj Gracie.

“Gëzuar ditëlindjen vajzës më të ëmbël që kam takuar ndonjëherë. Gjëja më e mirë në jetën time është të jem nëna jote”, ka shkruar ajo.

Nënë e bijë ishin të pandashme, thonë miqtë e familjes dhe askush nuk mund të japë një shpjegim logjik për atë që e shtyu t’i jepte fund jetës. Young kishte më shumë se 100 mijë ndjekës në Instagram, ku modelonte për një kompani veshjesh sportive.

Një individ jashtëzakonisht i ndjeshëm, ajo ishte një avokate për trajtimin e sëmundjeve të shëndetit mendor për veteranët, ndërsa përpiqej të gjente zgjidhje për ish-ushtarakët e pastrehë. Ajo doli vullnetare për të ndihmuar njerëzit që kishin përvoja traumatike në ushtri.

Në shtator, ajo kishte postuar për Javën e Parandalimit të Vetëvrasjeve, duke kujtuar sesi vëllai i saj i madh kishte vrarë veten kur ajo ishte 14 vjeçe dhe duke inkurajuar këdo që ishte në rrezik të kontaktonte me të.

Mbetet e paqartë se çfarë e çoi në vetëvrasjen e Young. “Nga jashtë dukej se kishte gjithçka. Sëmundjet mendore janë kaq të përhapura, veçanërisht në ushtri. Duhet të gjejmë një mënyrë për të bërë diçka më të mirë”, ka shkruar shoqja e saj.

Një total prej 25,000 dollarësh janë mbledhur në faqen GoFundMe të Young. Paratë do t’i jepen vajzës së saj.