Policia sekuestron hardhuca me vlerë 800 mijë dollarë nga kontrabandistët e dyshuar
Nga OraNews Përditësimi i fundit 8 Janar 2024, 21:31
Policia në Australi ka çmontuar atë që ata besojnë se është një rrjet kontrabande që po përpiqej të eksportonte hardhuca dhe zvarranikë vendas me vlerë më shumë se 1.2 milionë dollarë australianë (800,000 dollarë) në Hong Kong.
Tre burra, të moshës 54, 59 dhe 31, dhe një grua, 41 vjeç, u arrestuan në Sydney si pjesë e hetimit, tha Policia e Uellsit të Ri Jugor në një deklaratë të botuar të hënën. Operacioni filloi në shtator 2023, kur nëntë pako me 59 hardhuca të gjalla u ndaluan gjatë rrugës për në Hong Kong.
Të katër anëtarët e dyshuar të grupit janë planifikuar të dalin në gjykatë në janar. “Policia do të pretendojë në gjykatë se grupi kriminal kapte hardhuca të gjalla dhe zvarranikë vendas australianë për t’i eksportuar për përfitime në Hong Kong”, thuhet në deklaratën e policisë.
“Kafshët u mbajtën në kushte të këqija dhe u lidhën në kontejnerë të vegjël kur u paketuan për t’u dërguar,” shtoi deklarata. Policia tha se oficerët gjetën gjithsej 257 hardhuca dhe tre gjarpërinj gjatë hetimit, si në pako ashtu edhe në adresat e përdorura nga grupi.
Zvarranikët “u dërguan në kopshte zoologjike të ndryshme dhe parqe të kafshëve të egra për ekzaminim nga një veteriner përpara se të liroheshin përsëri në natyrë”, shtoi deklarata.
