Presidentja e Moldavisë akuzon mercenarët "Wagner" për komplot për grusht shteti

Nga OraNews Përditësimi i fundit 7 Tetor 2023, 10:28

Grupi mercenar rus “Wagner” ka planifikuar një grusht shteti në Moldavi, tha dje në mbrëmje presidentja Maia Sandu.

“Plani ishte për të korruptuar votuesit dhe për t’i kthyer protestat antiqeveritare të dhunshme”, tha ajo.

“Situata është me të vërtetë dramatike dhe ne duhet të mbrohemi”, tha Sandu në një intervistë për “The Financial Times”.

Ajo tha se paratë ishin kontrabanduar nga Rusia në ish-republikën sovjetike, e cila shtrihet midis Ukrainës dhe Rumanisë, pjesërisht me korrierë dhe pjesërisht përmes llogarive bankare në Dubai.

Në Moldavi kishte paralajmërime për një grusht shteti të afërt në fillim të vitit. Në mars, qeveria në Kishinau raportoi gjithashtu arrestimin e një mercenari “Wagner”.

Grupi “Wagner” ka luftuar prej kohësh së bashku me trupat e rregullta ruse në luftën kundër Ukrainës.

Por ish-udhëheqësi i saj Yevgeny Prigozhin më vonë kritikoi ashpër udhëheqjen ushtarake të Rusisë dhe në qershor nisi një marshim kryengritës drejt Moskës, por e anuloi atë në të njëjtën ditë.

Dy muaj më vonë, avioni i Prigozhin u rrëzua mbi tokën ruse në rrethana të paqarta.