OPEC akordon 500,000 dollarë për Libinë për të ndihmuar rajonin e prekur nga përmbytjet
Nga OraNews Përditësimi i fundit 5 Tetor 2023, 06:43
Fondi i OPEC-ut për Zhvillimin Ndërkombëtar (Fondi OPEC) po ndërmerr veprime për të mbështetur përpjekjet e ndihmës dhe rimëkëmbjes në Libi pas stuhisë Daniel, e cila goditi vendin muajin e kaluar.
Reshjet rekord dhe përmbytjet shkaktuan dëme të rënda dhe humbje tragjike të jetës me mbi 10,000 viktima dhe dhjetëra mijëra të tjerë të zhdukur dhe të zhvendosur me forcë.
Në përgjigje të emergjencës humanitare, Fondi i OPEC ka miratuar një grant ndihme prej 500,000 dollarësh për të ofruar ndihmë urgjente dhe afatmesme për popullsinë e prekur duke plotësuar nevojat thelbësore si ushqimi, uji i pastër, strehimi, si dhe masat mbrojtëse dhe parandaluese.
Granti do të kanalizohet përmes Federatës Ndërkombëtare të Shoqatave të Kryqit të Kuq dhe Gjysmëhënës së Kuqe (IFRC) për të mbështetur operacionet e Shoqatës së Gjysmëhënës së Kuqe Libiane (LRCS) dhe për të ofruar ndihmë në terren.
Stuhia goditi qendrat kryesore të popullsisë si qytetet Bengazi, Tobruk dhe Derna, duke shkaktuar dëme të rënda në sistemin shëndetësor, energjinë elektrike, telekomunikacionin, infrastrukturën dhe rrugët, duke kufizuar aksesin në këto zona.
Granti i Fondit të OPEC-ut është krijuar për të ofruar ndihmë të menjëhershme për rajonet më të prekura dhe anëtarët më të cenueshëm të popullsisë, duke përfshirë familjet, fëmijët, të moshuarit dhe njerëzit me aftësi të kufizuara.
