EMRAT + PAMJET/ Vijon beteja anti-kanabis, arrestohen babë e bir në Lazarat. Ja çfarë gjeti policia në banesë

Nga OraNews Përditësimi i fundit 16 Gusht 2023, 10:26

Janë arrestuar në flagrancë dy shtetas, babë e bir në fshatin Lazarat në Gjirokastër teksa kujdeseshin për bimët narkotike.

Konkretisht policia njofton se u arrestuan në flagrancë shtetasit Ardian Skënduli dhe Engli Skënduli për veprat penale“ Prodhimi dhe shitja e narkotikëve” dhe “Kultivimi i bimëve narkotike”.

Në banesën e të arrestuarve u gjet një sasi lënde kanabis sativa si dhe u asgjësuan përmes djegies bimët narkotike.

Njoftimi i policise:

Gjirokastër/Si rezultat i përdorimit të dronëve, finalizohet operacioni policor antikanabis i koduar “Kujdesi”.

Kishin kultivuar dhe prodhuar cannabis sativa, në fshatin Lazarat, kapen në flagrancë teksa kujdeseshin për bimët narkotike dhe vihen në pranga 2 shtetas (babai dhe djali).

Asgjësohen nëpërmjet djegies, bimë narkotike dhe sekuestrohet një sasi lënde narkotike cannabis sativa që u gjet në banesën e 2 të arrestuarve.

Si rezultat i administrimit të menjëhershëm të informacioneve të siguruara nga inteligjenca policore, se në një banesë në fshatin Lazarat, kultivoheshin bimë narkotike cannabis sativa, shërbimet e Komisariatit të Policisë Gjirokastër finalizuan operacionin policor të koduar “Kujdesi”, në kuadër të të cilit u vunë në pranga shtetasit A. S., 51 vjeç dhe E. S., 28 vjeç (babai dhe djali), të dy banues në fshatin Lazarat.

Të dy këta shtetas u kapën në flagrancë nga dronë të rezolucionit të lartë, të përdorur në këtë operacion, teksa kujdeseshin për 50 bimët e dyshuara narkotike cannabis sativa që kishin mbjellë në oborrin e banesës së tyre. Si rezultat i kontrolleve të imtësishme në këtë banesë, Policia gjeti një sasi lënde të dyshuar narkotike cannabis sativa.

Lënda narkotike u sekuestrua në cilësinë e provës materiale, ndërsa 50 bimët narkotike u asgjësuan nëpërmjet djegies.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.