Vidhnin në Tiranë, vihet në pranga 33-vjeçari, procedohet i mituri bashkëpunëtor i tij
Nga OraNews Përditësimi i fundit 17 Mars 2023, 15:05
Finalizohet operacioni policor i koduar "Influence", për goditjen e veprimtarisë kriminale në fushën e vjedhjes së pronës dhe pasurisë.
Zbardhen 3 raste të vjedhjes, të kryera në Tiranë, gjatë muajit mars dhe vihet në pranga autori i dyshuar, i cili kishte shtytur një shtetas të mitur (15 vjeç), për të vjedhur me të.
Procedohet në gjendje të lirë 15-vjeçari, bashkëpunëtor në vjedhje.
Këta shtetas, në bashkëpunim me njëri-tjetrin, më datë 13 mars 2023, kanë tentuar të vjedhin në një farmaci, ndërsa më datë 15 mars 2023, kanë vjedhur shuma parash, në 2 subjekte të ndryshme.
“Shërbimet e Komisariatit të Policisë Nr. 2, në vijim të punës për goditjen e paligjshmërisë në fushën e vjedhjes së pronës dhe pasurisë, bazuar dhe në inteligjencën informative, organizuan dhe finalizuan operacionin policor të koduar "Influence".
Si rezultat i këtij operacioni: u vu në pranga shtetasi R. Ll., 33 vjeç, banues në Tiranë, për veprat penale “Vjedhja”, kryer në bashkëpunim, më shumë se një herë dhe “Shtytja e të miturve në kërkim”; nisi procedimi penal në gjendje të lirë për një shtetas të mitur 15 vjeç, për veprën penale “Vjedhja”, kryer në bashkëpunim, më shumë se një herë”. - njofton policia.
Materialet procedurale i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.
