KQZ rrëzoi kërkesën për regjistrimin e PD në zgjedhje, Indrit Sefa dorëzon ankimimin në KAS
Nga OraNews Përditësimi i fundit 14 Mars 2023, 18:57
Partia Demokratike e përfaqësuar nga Alibeaj nuk ka humbur kohë.
Menjëherë pas vendimit të KQZ-së për të mos regjistruar PD-në në zgjedhje, përfaqësuesi ligjor Indrit Sefa paraqiti ankimin në KAS.
Për mediat ai përsëriti se vendimi i sotëm i KQZ-së ishte politik.
Sefa: PD s’ka kohë për të humbur, ishte vendimmarrje politike nga komisioneri. Ne kërkojmë shqyrtimin nga KAS, të ankesës tonë, i cili të marrë në konsideratë kërkesat e PD dhe të shfuqizojë këtë vendim, tërësisht të pabazuar në ligj.
Nesër në orën 8:30, hidhet shorti për caktimin e relatorit për kërkesën ankimore të depozituar nga Partia Demokratike e Shqipërisë.
Po nesër, Komisioneri Shtetëror i Zgjedhjeve zhvillon seancë publike në orën 12:00 me rend dite 14 majin 2023.
"Vlerësimi i ditëve të veprimtarive me karakterin e aktiviteteve të disa personave, për periudhën 3 mars – 9 mars 2023".
Komisioneri Shtetëror i Zgjedhjeve Ilirjan Celibashi vendoi sot të mos pranojë regjistrimin e Partisë Demokratike me kryetar zotin Lulzim Basha, si pjesëmarrëse në zgjedhjet vendore të 14 majit.
Sipas zotit Celibashi, kërkesa për t’u regjistruar nuk ka bazë ligjore e nuk duhet të pranohet, duke sjellë në vëmendje çështjen e ngritur prej tij dhe në seancën e parë të datës 9 mars, lidhur me deklaratën solemne që çdo parti paraqet mes dokumentacionit të kërkuar për rregjistrim.
Deklarata nga ana e Partisë Demokratike është e firmosur nga zoti Enkelejd Alibeaj, si person i autorizuar nga zoti Basha, tre ditë përpara dorëheqjes së tij në mars të vitit të kaluar.
Zoti Basha rezulton ende si kryetar i PD-së në rregjistrin e partive politike në Gjykatën e Tiranës. Dhe për këtë arsye, sipas zotit Celibashi, duhet që të jetë ai që ta nënshkruajë, duke nënvizuar se ky është një përcaktim ligjor që nuk mund të delegohet.
