Vritet guvernatori taleban, i vunë bombë në zyrë
Nga OraNews Përditësimi i fundit 9 Mars 2023, 12:03
Guvernatori taleban i provincës veriore të Afganistanit, Balkh është vrarë në një shpërthim në zyrën e tij.
Mohammad Dawood Muzammil është zyrtari më i lartë që është vrarë që kur talebanët u kthyen në pushtet në vitin 2021.
Dhuna është ulur ndjeshëm që atëherë, por ka pasur një varg sulmesh ndaj figurave të njohura pro-talebane dhe objektivave të tjera.
Policia lokale tha se çfarë e shkaktoi shpërthimin e së enjtes ishte e paqartë. Nuk kishte asnjë pretendim të menjëhershëm për përgjegjësinë.
Por zëdhënësi i talebanëve Zabihullah Mujahid tha në Twitter se guvernatori ishte "martirizuar në një shpërthim nga armiqtë e Islamit". Një hetim është duke u zhvilluar, shtoi ai.
Muzammil raportohet të ketë udhëhequr luftën kundër militantëve të Shtetit Islamik në postin e tij të mëparshëm si guvernator i provincës lindore të Nangarharit. Ai u transferua në Balkh tetorin e kaluar.
Policia tha se të paktën një person tjetër gjithashtu vdiq në sulm. Raportohet se kanë mbetur të plagosur një sërë të tjerë. Raportet e pakonfirmuara thonë se ishte një sulm vetëvrasës.
Kjo vjen një ditë pasi autoritetet provinciale talebane pretenduan se kishin vrarë tetë "rebelë dhe rrëmbyes" në Mazar-e Sharif, kryeqyteti i provincës Balkh. Megjithatë, ata nuk specifikuan se cilit grup "rebel" dyshohet se këta individë ishin të lidhur.
