Agjencive federale në SHBA iu dha 30 ditë kohë për të fshirë TikTok nga telefonat e tyre
Nga OraNews Përditësimi i fundit 28 Shkurt 2023, 07:21
Agjencive federale amerikane u kërkohet të garantojnë që pajisjet e tyre nuk do të kenë të instaluar aplikacionin TikTok dhe nuk do të lejojnë instalimin ose përdorimin e aplikacionit TikTok brenda një periudhe maksimale prej 30 ditësh, sipas një qarkoreje të lëshuar të hënën nga Departamenti i Menaxhimi dhe Buxheti (Zyra e Menaxhimit dhe Buxhetit, OMB) e Shtëpisë së Bardhë.
Aplikacioni TikTok, i kompanisë kineze ByteDance , është vënë në shënjestër të ligjvënësve amerikanë, sipas të cilëve përbën një kërcënim për sigurinë kombëtare të SHBA.
Përdorimi i tij në pajisjet e zyrtarëve publikë u ndalua me një ligj të miratuar në fund të dhjetorit.
Qarkorja e OMB-së u shpërnda për të sqaruar zbatimin e ligjit, i cili u nënshkrua në ligj nga Presidenti Joe Biden në fillim të janarit.
"Memorandumi drejtuar krerëve" të agjencive federale, i nënshkruar nga Salanda Young , kreu i OMB, u kërkon të gjithëve që të "çinstalojnë dhe ndalojnë instalimin" e aplikacionit në pajisjet që zotërojnë ose menaxhojnë dhe të "ndalojnë trafikun e internetit" nga pajisjet e tyre në këtë aplikacion.
Platforma jashtëzakonisht e popullarizuar është vënë nën kritika në Perëndim, ku disa qeveri thonë se janë të shqetësuara se Pekini mund të ketë akses në të dhënat e përdoruesve në të gjithë botën.
Ndalimi i përdorimit të tij në pajisjet e qeverisë federale të SHBA-së regjistrohet pak ditë pas vendimit të ngjashëm të marrë nga Komisioni Evropian , që ndalon përdorimin e TikTok për të gjithë personelin e tij pa përjashtim, për “mbrojtjen” e institucionit.
Qeveria e Kanadasë, nga ana e saj, njoftoi dje të hënën se do të ndalojë përdorimin e platformës TikTok në të gjitha pajisjet celulare që i janë dhënë personelit të saj nga e marta, duke përmendur një "nivel të papranueshëm rreziku" për sigurinë dhe privatësinë.
TikTok ishte gjithashtu ndër aplikacionet kineze në internet të ndaluara në Indi në vitin 2020.
Me mbi një miliard përdorues aktivë globalisht, TikTok renditet i gjashti ndër faqet e rrjeteve sociale më të përdorura, sipas raportit të fundit We Are Social mbi evolucionin e shërbimeve dixhitale, të publikuar në janar.
Shërbimi TikTok pranoi në nëntor se disa nga punonjësit e tij në Kinë mund të kenë pasur akses në të dhënat e përdoruesve evropianë dhe në dhjetor se punonjësit e tij kishin përdorur të dhëna për të gjurmuar gazetarët. Por kompania që menaxhon platformën mohon kategorikisht që të ketë akses dhe kontroll nga qeveria kineze mbi këto të dhëna.
