Lëkundjet e djeshme të tërmetit, 3 viktima, 213 të plagosur e të tjerë të bllokuar sërish nën rrënoja
Nga OraNews Përditësimi i fundit 21 Shkurt 2023, 07:18
Ekipet e shpëtimit po kërkojnë edhe një herë për njerëzit e bllokuar nën rrënoja në Turqi pasi dy tërmete të tjera goditën vendin, duke vrarë të paktën tre persona.
Lëkundjet me magnitudë 6.4 dhe 5.8 goditën në jug-lindje pranë kufirit me Sirinë, ku tërmete masive shkatërruan të dy vendet më 6 shkurt.
Tërmetet e mëparshme vranë 44,000 njerëz në Turqi dhe Siri dhe dhjetëra mijëra të tjerë mbetën të pastrehë.
Ndërtesat e dobësuara nga këto lëkundje u shembën në të dy vendet të hënën.
Agjencia turke e fatkeqësive dhe emergjencave thotë se tërmeti me magnitudë 6.4 ndodhi në orën 20:04 me orën lokale, i ndjekur nga tërmeti 5.8 tri minuta më vonë.
Tre vdekjet ndodhën në Antakia, Defne dhe Samandag, tha Ministri i Brendshëm Süleyman Soylu, duke u kërkuar njerëzve të mos hyjnë në ndërtesa potencialisht të rrezikshme.
Soylu tha se 213 persona ishin plagosur gjithashtu.
Raportet nga qyteti i Antakias flisnin për frikë dhe panik në rrugë, ndërsa ambulancat dhe ekipet e shpëtimit u përpoqën të arrinin në zonat më të prekura, ku muret e ndërtesave të dëmtuara rëndë ishin shembur.
"Mendova se toka do të çahej nën këmbët e mia," tha banorja lokale Muna al-Omar për agjencinë e lajmeve Reuters, duke qarë ndërsa mbante djalin e saj shtatëvjeçar. Ajo kishte qenë në një tendë në një park në qendër të qytetit kur ranë tërmetet e reja.
