Presidenti Biden uron 15-vjetorin e Pavarësisë së Kosovës, përmend njohjen reciproke me Serbinë
Nga OraNews Përditësimi i fundit 16 Shkurt 2023, 17:58
Me rastin e 15 vjetorit të Pavarësisë së Kosovës, Presidentja e Kosovës, Vjosa Osmani, ka marrë një letër urimi nga presidenti i SHBA, Joe Biden.
“Në emër të popullit të Shteteve të Bashkuara, ju dërgoj urimet tona më të mira për ju dhe popullin e Kosovës, gjersa shënoni 15-vjetorin e pavarësisë së vendit tuaj. Përgjatë viteve të fundit, Kosova dhe Shtetet e Bashkuara kanë forcuar institucionet demokratike për të ofruar në mënyrë të barabartë efektive qeverisje të mirë, sundim të ligjit dhe mundësi për qytetarët në të dy vendet tona”, thuhet në letrën e Bidenit.
Bideni ka shprehur mbështetje për integrimin e Kosovës në institucionet euroatlantike, si dhe për dialogun me Serbinë, duke përmendur edhe njohjen reciproke mes dy vendeve.
“SHBA-ja do të vazhdojë ta përkrahë Kosovën në integrimin e saj drejt institucioneve euroatlantike dhe dialogun e lehtësuar nga BE-ja për normalizimin e marrëdhënieve me Serbinë. Ne e mirëpresim miratimin e propozimin evropian nga ana juaj për normalizim, me qëllimin kryesor njohjen reciproke, që do të ndihmonte në sigurimin e paqes dhe prosperitetit në të ardhmen për qytetarët në Kosovës dhe Serbisë”, thuhet në letrën e Bidenit.
Ditën e sotme dhe presidenti i Shqipërisë Bajram Begaj ka zhvilluar vizitë zyrtare në Kosovë me rastin e 15 vjetorit të pavarësisë.
