Ministri japonez: Objektet e paidentifikuara vitet e fundit në qiellin e Japonisë mund të kenë qënë balona spiune kineze
Nga OraNews Përditësimi i fundit 15 Shkurt 2023, 10:27
Ka indikacione "të forta" se objektet fluturuese të paidentifikuara të vërejtura në hapësirën ajrore të Japonisë vitet e fundit ishin balona spiunazhi kinez , sipas një analize të re, tha ministria e mbrojtjes e Japonisë.
“Pas një hetimi më të plotë të objekteve fluturuese të ngjashme me balonat që janë pikasur në hapësirën ajrore japoneze në të kaluarën – duke përfshirë ato të vërejtura në nëntor 2019, qershor 2020 dhe shtator 2021 – ne kemi arritur në përfundimin se ka prova të forta që këto ishin balona zbulimi pa pilot të dërguara nga Kina ”, tha ministria në një deklaratë të martën.
Tokio “kërkoi fuqishëm ngaQeveria kineze të konfirmojë këto ngjarje” dhe të zotohet se “një situatë e tillë nuk do të përsëritet në të ardhmen”.
“Shkeljet e hapësirës ajrore nga balonat e huaja të zbulimit pa pilot dhe mjete të tjera janë krejtësisht të papranueshme ”, nënvizoi Ministria e Mbrojtjes e Japonisë.
Tokio tani po shqyrton rishikimin e procedurave të saj për trajtimin e objekteve fluturuese ilegalisht në hapësirën e saj ajrore për ta bërë më të lehtë shkatërrimin e tyre, raportuan sot mediat japoneze.
Deri më tani, këto objekte mund të rrëzoheshin me armë vetëm nëse përbënin një kërcënim të menjëhershëm dhe të qartë, raportoi agjencia e lajmeve Kyodo.
"Unë mendoj se kjo çështje ngre shqetësime për një boshllëk të mundshëm të madh në mbrojtjen e Japonisë," tha shefi i sigurimit të partisë në pushtet dhe ish-ministri i mbrojtjes Itsunori Onodera.
Japonia njoftoi javën e kaluar se po shqyrtonte një seri incidentesh që përfshinin objekte fluturuese të paidentifikuara pas rrëzimit të një baloni kineze nga SHBA në fillim të shkurtit.
