Koreja e Veriut lëshon një tjetër raketë, ministri japonez: Me rreze për të goditur SHBA
Nga Amado Çela Përditësimi i fundit 18 Nëntor 2022, 07:52
Japonia pretendon se Koreja e Veriut lëshoi një raketë balistike ndërkontinentale e cila mund të arrinte deri në Shtetet e Bashkuara. Koreja e Jugut, Tokio dhe Uashingtoni do të zhvillojnë bisedime të mëtejshme për të dhënë një kundërpërgjigje ndaj Penianit.
Koreja e Veriut ka lëshuar një raketë balistike ndërkontinentale me rreze të mjaftueshme për të goditur territorin e SHBA-së, tha ministri japonez i mbrojtjes.
“Bazuar në llogaritjet duke marrë parasysh trajektoren, raketa balistike këtë herë mund të kishte një kapacitet veprimi prej 15,000 km, në varësi të peshës së kokës së saj, dhe nëse është kështu, do të thotë se kontinenti i SHBA ishte brenda rrezes së saj.
Ne i kemi thënë (Phenianit) se absolutisht nuk mund të tolerojmë veprime të tilla," tha ai.
Raketa ra në det afërsisht 210 km në perëndim të Hokkaido.
SHBA e ka dënuar nisjen, ndërsa Koreja e Jugut ka urdhëruar masa më të forta parandaluese kundër Veriut.
Ministri i Jashtëm i Koresë së Veriut, Choe Son Hui, paralajmëroi të enjten për një përgjigje "më të ashpër" ndaj çdo pranie të shtuar ushtarake amerikane.
Ajo lëshoi gjithashtu një raketë balistike me rreze të shkurtër veprimi në të njëjtën ditë.
Kjo pasoi takimin e së dielës midis Presidentit të Koresë së Jugut Yoon Suk-yeol, Presidentit të SHBA Joe Biden dhe kryeministrit të Japonisë Fumio Kishida në Kamboxhia.
Të premten, zëdhënësja e Këshillit të Sigurisë Kombëtare të SHBA-së, Adrienne Watson tha se Biden ishte informuar dhe SHBA do të konsultohej me partnerët.
Koreja e Veriut ka lëshuar më shumë se 50 raketa gjatë dy muajve të fundit, shumica e tyre me rreze të shkurtër. Këto lëshime me rreze të gjatë janë më të rralla dhe përbëjnë një kërcënim të drejtpërdrejtë për SHBA-në, pasi raketat janë projektuar për të transportuar koka bërthamore kudo në kontinentin e SHBA-së.
