Objekti pa leje në Llixha çon në pranga dy inspektorë të IMT Elbasan dhe punëtorët, në kërkim pronari
Nga OraNews Përditësimi i fundit 3 Dhjetor 2021, 08:49
Ky objekt me sipërfaqe 5000 metra katror që po ndërtohej pa leje në zonën e mbrojtur të Llixhave në Elbasan ka zbuluar një tjetër rast korrupsioni në Inspektoriatin e Mbrojtjes së Territorit pranë bashkisë së Drejtuar nga Gledian Llatja.
Ndërtimi financohej nga 64-vjeçari me Todi Puka, pronar i një tjetër hoteli në zonën e Llixhave,i cili dyshohet se përmes korrupsionit ka ndikuar tek funksionarë lokalë për të hedhur beton duke shkelur ligjin.
Abuzimi është zbuluar nga policia e cila pas verifikimeve u ka vënë prangat inspektorëve të Inspektoratit Vendor të Mbrojtjes së Territorit në bashkinë Elbasan, Donald Ziu, 28 vjeç dhe Alian Zabeli 34 vjeç.
Ky i fundit ishte proceduar vetem pak ditë më parë me dyshimin se kishte lejuar një tjetër ndërtim pa leje në zonën e Llixhave në Elbasan.
Financuesi i objektit pa leje dhe korrupsionit të zyrtarëve të Bashkisë Elbasan, Todi Puka deri më tani i ka shpëtuar arrestimit dhe ndodhet në arrati.
Në prangat e policisë përfunduan dhe punëtorët që po ndërtonin hotelin në zonën e mbrojtur pa asnjë dokumentacion, përkatësisht:
-Indrit Çekrezi
-Xhoi Pullumbi
-Kristo Gjyla
-Albion Dedja
-Shkëlqim Vlashi
-Selman Vlashi
-Kledis Muça
Operacioni “Llixhat” ka nisur rreth dy javë më parë nga Policia e Elbasanit e cila ka vënë nën shenjestër raste të dyshuara korrupsioni mes punonjësve të IMT-së së Bashkisë Elbasan.
Më 22 nëntor, ish-kryeinspektori i Inspektoratit të Mbrojtjes së Territorit në Elbasan, Mario Qosja, 38 vjeç, u arrestua për favorizimin e një ndërtimi 1200 metër katrorë pa leje nga Ndriçim Kuqja po në zonën e Llixhave.
