Një konflikt në dehje e sipër mes tre personave në Elbasan ka përfunduar me vdekjen e njërit prej tyre. Ngjarja ka ndodhur në orët e para të mëngjesit të sotëm në lagjen ” Luigj Gurakuqi”.

Policia thotë se “në gjendje të dehur  janë konfliktuar duke u dëmtuar me  njëri-tjetrin me shishe  dhe sende të forta shtetasit A.H., 42 vjeç,  S.S., 34 vjeç,  dhe  F.L., rreth 40 vjeç, banues në Elbasan”.

Si pasojë e  plagëve  të marra, Florian Lamçe ka ndërruar jetë. Viktima u gjetnë afërsi të parkut “Aqif Pasha” pa shenja jete dhe i gjakosur.

Dy shtetasit e tjerë të perfshirë në këtë konflikt kanë marrë plagë të lehta dhe janë shoqëruar në Komisariatin e Policisë Elbasan, për sqarimin e rrethanave të ngjarjes.

Grupi hetimor vijon punën pēr zbardhjen dhe dokumentimin e plotë të ngjarjes.

Florian Lamçe njihet si person me precedentë penalë. Ai ka qenë i dënuar me tre vite burg për akuzën e ‘pengimit të zbardhjes së vërtetës’, si dhe është hetuar edhe për dy plagosje.

Ndërsa i vëllai i Florian Lamçes,  Olti Lamçe, është dënuar me 24 vite burg për vrasje.

Në vitin 2011, ai vrau pronarin e disko “Tekiles”, Almir Canin.