Tre kushërinjtë grabisin karburantin në Fushë Krujë, dy në pranga
Një karburant u grabit me armë në orët e para të mëngjesit, (12 prill 2021) pranë vendit të quajtur Ura e Gjolës në Arrameras të Fushë Krujës.
Tre autorët hynë të maskuar dhe nën kërcënimin e armës arritën të marrin një sasi parash e më pas u larguan me shpejtësi.
Por gjurmët e lëna në vendngjarje i kanë tradhtuar dhe dy prej tyre kanë përfunduar në pranga brenda disa orës, ndërsa i treti është shpallur në kërkim.
Në pranga u vunë Skënder Çangu 30 vjeç dhe Zenun Çangu 17 vjeç si dhe u shpall në kërkim Amarildo Çangu, 17 vjeç, që të tre kushërinj me njëri tjetrin.
Policia gjeti dhe sekuestroi një pushkë, automjetin dhe veshjet e përdorura nga personat në fjalë, në momentin e ngjarjes.
Ky ishte rasti i tretë i grabitjes me armë dhe maska vetëm në zonën e Fushë Krujës në më pak se një muaj.
Më datë 9 prill një biznes i ngjashëm u grabit nga tre persona, ku një prej të cilëve mbetet ende në arrati.
Ndërsa më 19 mars, katër të rinj u arrestuan nga Policia e Krujës si pjesë e një grupi që dyshohet për disa vjedhje në zonë, përfshirë edhe një pikë karburanti.