Videot denoncuese: Mjetet e rënda vijojnë derdhjen e mbetjeve urbane në Manzë
Banorët e Manzës denoncuan me video të dërguara pranë 'Ora News' se zona vijon të përdoret për venddepozitimin e mbetjeve urbane, pavarësisht se disa javë më parë u tha se kriza e menaxhimit të mbetjeve në Durrës u zgjidh me dërgimin në Sharrë.
Dyshimet e tyre janë se mbetjet kanë ardhur nga qyteti, por ky pretendim nuk mund të provohet me këto pamje amatore, ndërsa reagimi nga institucionet mungon.
Me rikthimin e fenomenit pavarësisht protestave të vazhdueshme, edhe banorët kanë ndryshuar strategjinë e përballjes.
Të shtunën kanë bllokuar rrugën me këto blloqe masive betoni ku kanë shkruar edhe një mesazh të qartë për autoritetet.
''Jemi të detyruar që t'i nxjerrim vështirësi e pengesë, do ta mbrojmë me çdo kusht. E ka fituar tenderin për t'i çuar në SHarrë. Aty t'i çojë, e jo këtu sheshit.''
Banorët thonë se depozitimi dhe djegia e mbetjeve aty u ka vështirësuar jetesën duke e kthyer zonën në një bombë ekologjike.
''U bënë 2-3 javë që po hedhin tonelata çdo ditë. Një herë në dy javë digjen.''
E ashtuquajtura kriza e mbetjeve në Bashkinë Durrës nisi në muajin qershor kur venddepozitimi i Porto Romanos u mbyll për tu shndërruar në një eko park.
Qyteti nuk u pastrua për disa ditë, ndërsa bashkia u detyrua të shpallë emergjencën mjedisore.