"7 mijë azilantë shqiptarë", Sekretarja britanike kërkon përshpejtimin e kthimit të emigrantëve nga Shqipëria

Laburistët do të përshpejtojnë kthimet e aplikimeve për azil për njerëz nga vende që konsiderohen “të sigurta”, përfshirë Shqipërinë, në një përpjekje për të pastruar numrin e kërkesave të mbetura, tha Yvette Cooper.

Sekretarja e Brendshme tha se donte të risillte sistemin që Laburistët kishin gjatë kohës që ishin në qeveri, në të cilin Zyra e Brendshme i jepte përparësi pretendimeve nga vende të caktuara dhe i përpunonte ato brenda disa ditësh.

Kjo skemë u braktis pasi gjyqtarët vendosën se ishte "strukturalisht e padrejtë", me rreth 99% të kërkesave që u refuzuan pothuajse menjëherë.

Cooper tha se një kthim në sistemin e shpejtë ishte i garantuar për shkak të vonesave të mëdha në përpunimin e kërkesave për azil. Gati dy të tretat e aplikantëve për azil kanë pritur më shumë se gjashtë muaj për një vendim, sipas shifrave të Home Office.

Cooper i tha programit të Radio 4 Today: “Ne do të përshpejtonim rastet nga vende të caktuara të sigurta – që përfshin Shqipërinë – ku ka pasur një rritje të madhe të njerëzve që mbërrijnë kohët e fundit. Dhe çfarë do të thotë është se nëse çështjet janë qartazi të pabazuara, ato mund të vendosen shpejt dhe të kthehen me shpejtësi.”

Ajo shtoi: “Për momentin, sistemi është në kaos”.

Zyra e Brendshme po përpiqet të pastrojë numrin e kërkesave për azil që ka të pazgjidhura.

Këtë vit, 44,000 migrantë kanë kaluar Kanalin me gomone dhe qeveria thotë se po shpenzon gati 5 milionë paund çdo ditë duke strehuar 37,000 njerëz në hotele, ndërkohë që rastet e tyre janë duke u përpunuar.

Shifrat e Home Office tregojnë se  deri në qershor 2022, më shumë se 7,000 shqiptarë kanë bërë kërkesa për azil në Mbretërinë e Bashkuar pasi kanë mbërritur me gomone. Vetëm 50 prej tyre deri më tani kanë marrë vendimin, raporton The Guardian.

Kjo çështje është kthyer në një problem për kryeministrin Britanik Rishi Sunak, i cili është nën presionin e deputetëve për të ndërmarrë veprime më të rrepta.

Komentet e Sekretares së Brendshme, Suella Braverman, për këtë çështje shkaktuan protesta nga shqiptarët në Londër, ndërsa së fundi, ambasadori shqiptar në Britani u thirr në Komisionin e Punëve të Jashtme, në një seancë disa orëshe për çështjen e refugjatëve.