Dhuna në PD, reagojnë ambasadorët: Ulni tensionet!

Ndërkombëtarët kanë reaguar për protestën e kësaj të shtune  në selinë e Partisë Demokratike. Edhe pse i paralajmëruar për një protestë paqësore situata ka precipituar në dhunë ndaj protestuesve, thyerje dritaresh dhe dyersh, gjë që është dënuar me forcë nga ambasadorët e akredituar në Tiranë. SHBA garanton se ata që nxisin dhunë ose minojnë sundimin e ligjit do të mbajnë përgjegjësi.

Situata e krijuar këtë të shtunë në selinë e Partisë Demokratike ka shqetësuar edhe faktorin ndërkombëtar. Selitë kryesore në Tiranë kanë dënuar dhunën në protestën e demokratëve kundër kryetarit të tyre Lulzim Basha.

Për situatën e krijuar në Partinë Demokratike ka reaguar fillimisht ambasadorja amerikane në Tiranë Yuri Kim. Përmes rrjeteve sociale, Kim ka paralajmëruar se ata që nxisin dhunë ose minojnë sundimin e ligjit do të mbajnë përgjegjësi.

Delegacioni i Bashkimit Evropian u ka bërë thirrje të gjithë protestuesve të përfshirë të ruajnë qetësi dhe ka dënuar aktet e dhunës.

Ambasadori Zingraf deklaroi se në politikën demokratike nuk ka vend për dhunë.

Gjithashtu ambasadori Britanik, Alastir King Smith ka shprehur shqetësimin për përdorimin e dhunës nga ana e protestuesve në selinë e Partisë Demokratike.

Smith është shprehur se çdo mosmarrëveshje duhet të zgjidhet përmes dialogut, proceseve politike dhe ligjore, në interes të popullit shqiptar dhe jo interesave të ngushta individuale.

Protesta e thirrur nga ish-kryeministri Sali Berisha ditën e shtunë ka patur pjesëmarrje masive të qytetarëve dhe ende nuk dihet se cili do të jetë reagimi i kryetarit Basha dhe vendimi që ai do të marrë përballë kësaj situate.