UKT jep pa garë 161 mln lekë për kimikate, "W Center" rezulton fituese në 17 procedura, disa prej tyre problematike
Bashkia e Tiranës dhe institucionet në varësi të saj duket se kanë zgjedhur që tenderat për lëvrimin e fondeve nga buxheti ti zhvillojnë në mungesë të konkurrencës.
Pavarësisht shqetësimeve të ngritura në media apo raportet e organizatave monitoruese, Ndërmarrja e Ujësjellës Kanalizimeve ka zgjedhur të vijojë me këtë mënyrë për përzgjedhjen e kompanive fituese.
Rasti më i fundit lidhet me blerjen e kimikateve për nevojat e UKT-së me fond limit 165.7 milion lekë.
Referuar të dhënave në Agjencinë e Prokurimeve Publike, pjesëmarrësja e vetme në procedurë rezulton subjekti "W Center".
Kjo i ka sjellë në mënyrë të sigurt fitoren për vlerën e paraqitur prej 161.3 milion lekësh.
Proceduira e ndjekur nga institucioni në varësi të Veliajt është konsideruar problematike dhe nga Open Data, e cila e ka shënuar me flamur të kuq për mungesë konkurrence.
Në fakt, kompania "W Center" që nga viti 2016 rezulton fituese e 17 procedurave në tendera që kapin vlerën e më shumë se 761 milion lekëve.
Por bie në sy fakti se në shumë prej rasteve ku ka qenë pjesëmarrës ky subjekt janë konstatuar problematika.
Mungesa e konkurrencës apo skuaklifikimi i të gjithë rivalëve përveç fituesit është sinjalizuar nga Open Data me flamurin e kuq, duke shprehur shqetësim për procedurën e ndjekur në përzgjedhjen e fituesit.