Fitoi ndaj Salernitanës, Verona siguron qëndrimin në Serie A

Fitoi ndaj Salernitanës, Verona siguron qëndrimin në Serie A

Verona siguroi këtë të hënë qëndrimin në Serie A, në sfidën në transfertë ndaj Salernitanës, që ishte e vlefshme për raundin e 37-të ose thënë ndryshe për javën e parafundit të kampionatit italian.

Skuadra e Baronit diktoi ritmin e sfidës, ndërsa në fund ia doli që të fitojë me rezultatin 1-2.

Ishte Suslov ai i cili zhbllokoi takimin, me golin e shënuar në minutën e 22-të pas asistit të dhuruar nga Noslin.

Ndërsa në mbyllje të pjesës së parë, në minutën e 45+3’ Folorunsho dyfishoi avantazhin e Veronës.

Në fraksionin e dytë Verona pati raste të tjera për ta thelluar fitoren, megjithatë atë që nuk e bënë miqtë e realizuan vendasit, të cilët shënuan golin e vetëm në minutën e 90-të me Maggiore.

Pas kësaj jave Salernitana e vendit të fundit qëndron në kuotën e 16 pikëve, teksa Verona shpëton sezonin duke u renditur në vend të 13-të me 37 pikë, katër pikë më shumë se Empoli i vendit të 18-të, që përkon me pozicionin e fundit që bie nga kategoria.

EMISIONET