Alphonso Davies ka marrë propozimin për të rinovuar me Bayernin, spanjolë e presin…

Situata kontraktuale e Alphonso Davies premton të shkaktojë shumë polemika në të ardhmen e afërt: mbrojtësi i majtë ka një kontratë me Bayernin deri në fund të këtij sezoni dhe tashmë ka marrë një ofertë nga klubi bavarez për të rinovuar kontratën e tij.

Janë gjermanët në Bild ata që raportojnë se Davies tashmë u ka rrëfyer bashkëlojtarëve se ka marrë një ofertë rinovimi nga bavarezët. Negociatat mes dy palëve nuk kanë qenë pozitive, sidomos për shkak se lojtari, sipas të njëjtit burim, kërkon një pagë vjetore prej 16 milionë eurosh.

Megjithatë, paraqitjet e fundit të 24-vjeçarit kanadez e bëjnë drejtorin sportiv të klubit, Christoph Freund, të besojë në rinovimin e Davies. “E shoh duke u argëtuar në stërvitje çdo ditë. Ai ndihet rehat te Mynih dhe po luan në një nivel shumë të lartë për momentin”, tha ai këtë të premte, cituar nga Bild.

Uli Hoeness garanton se tashmë i kanë bërë propozimin e fundit kanadezit për rinovimin e kontratës, të cilën ai ose e pranon ose largohet me kosto zero vitin e ardhshëm.

Davies mbërriti te Bayern në vitin 2018 nga Vancouver Whitecaps. Që atëherë, ai ka fituar pesë herë Bundesligën dhe ishte një nga pikat kryesore të fitores së gjermanëve në Ligën e Kampionëve më 2020.

Real Madrid dhe Barcelona në pritje

Nëse Davies me të vërtetë largohet nga Bayerni, dy gjigantët spanjolë do të jenë shumë të interesuar për nënshkrimin e tij. Në të kaluarën, ishte raportuar nga AS se Real Madrid  bëri një ofertë për lojtarin verën e kaluar, të cilën Bayern e refuzoi.

Si i tillë, madrilenët  do të ishin të gatshëm të prisnin deri në vitin 2025 për ta marrë atë si një lojtar të lirë.

Bayern dhe Merengues nuk arritën marrëveshje, kështu që kanadezi ndoshta do të shkëmbejë Bundesligën me La Ligën vitin e ardhshëm, me kosto zero.

Barcelona gjithashtu ka të njëjtën strategji, me vështirësi më të mëdha financiare se rivali i saj i madh, klubi, sipas Mundo Deportivo, do të varet shumë nga tregu i lojtarëve të lirë vitin e ardhshëm për të përforcuar ekipin.

Sido që të jetë, topi tani është në fushën e Davies. Nëse ai mendon largimin nga Bayerni, La Liga duket të jetë destinacioni i ardhshëm i lojtarit.