Vërtet i kuron uthulla e mollës të gjitha?

Vërtet i kuron uthulla e mollës të gjitha?

Në TikTok, një burrë tret një lugë uthull molle në një gotë me ujë, e pi, pastaj ha dy feta picë dhe teston nivelin e sheqerit në gjak. ‘Nuk ka më mirë sa kaq’, - thotë ai, duke treguar se niveli i sheqerit është rritur shumë herë më pak sesa kur nuk piu uthull molle para se të hante picën.

Në poste të tjera, përdoruesit e TikTok-ut tregojnë se uthulla e mollës ka aftësi të jashtëzakonshme për të ndihmuar në humbjen e peshës, të qetësojë stomakun dhe nëse aplikohet në lëkurë, pastron aknet dhe ekzemën.

Uthulla e mollës është përdorur si një ilaç shtëpiak për shërimin e plagëve, qetësimin e kollës dhe dhembjeve të stomakut për mijëra vjet, tha Carol Johnston, dietologe në Universitetin Shtetëror të Arizonës.

Çfarë të mirash ka uthulla e mollës?

Uthulla e mollës bëhet përmes fermentimit, ku majaja dhe bakteret konvertojnë karbohidratet së pari në alkool dhe pastaj në acid acetik, i cili i jep uthullës shijen dhe aromën e mprehtë dhe përfitimet shëndetësore, - tha Dr. Johnston.

Sipas Dr. Chris Damman, disa njerëz sugjerojnë përdorimin e uthullës së mollës së papërpunuar me baktere dhe karbohidrate të patretura. Megjithatë, nuk ka asnjë provë që është më e shëndetshme se uthulla e zakonshme. Ai shpjegon se uthulla e mollës dhe frutave kanë polifenole, të cilat janë përbërës me veti antioksiduese dhe anti-inflamatore. Këto polifenole mund të jenë pjesë e përfitimeve të mundshme shëndetësore të këtyre uthullave.

Çfarë përfitimesh ka uthulla e mollës sipas studimeve?

Kontrollon sheqerin në gjak

Në fillim të viteve 2000, Dr. Johnston zbuloi një studim që tregonte se acidi acetik në uthull mund të ulë nivelet e sheqerit në gjak te minjtë. Më pas, e testoi këtë te njerëzit me diabet të tipit 2 dhe zbuloi se konsumimi i uthullës para vakteve të pasura me karbohidrate rezultoi në rritje më pak drastike të sheqerit në gjak.

Disa studime sugjerojnë se uthulla mund të ngadalësojë tretjen dhe të ndërhyjë në ndarjen e karbohidrateve, duke çuar në uljen e niveleve të sheqerit në gjak. Megjithatë, nevojiten më shumë kërkime për të konfirmuar sigurinë dhe përfitimet afatgjata.

Humbje peshe

Sipas disa studimeve ka lidhje të mundshme mes uthullës së mollës dhe humbjes së peshës tek individët mbipeshë ose obezë.

Për shembull, një studim në Japoni zbuloi se ata që pinë uthull molle çdo ditë për tre muaj humbën rreth 6 kilogramë. Një tjetër në Liban raportoi një humbje mesatare të peshës prej 6 kilogramësh ngaqë pinë uthull molle për tre muaj.

Megjithatë, është e rëndësishme të theksohet se pjesëmarrësit e rifituan peshën pas ndalimit të konsumit të uthullës dhe shumë studime nuk kanë gjetur lidhje midis uthullës dhe humbjes së peshës.

Për shkak të të dhënave të kufizuara dhe kohëzgjatjes së shkurtër të studimit, dietologët si Beth Czerwony nuk rekomandojnë përdorimin e uthullës së mollës për humbje peshe.

Është e mundur që uthulla mund të ndihmojë në humbjen e peshës, duke ju dhënë ndjesinë e ngopjes për më gjatë.

Provat te njerëzit janë të përziera, është e besueshme që uthulla mund të ketë njëfarë ndikimi në humbjen e peshës.

Shëndeti i zorrëve

Disa njerëz me refluks acidi gjejnë lehtësim duke pirë uthull molle, ndërsa të tjerë thonë se kjo përkeqëson simptomat e tyre. Megjithatë, nuk ka asnjë kërkim shkencor për të mbështetur efektivitetin e tij për shëndetin e tretjes.

Përmirëson lëkurën

Aplikimi i uthullës së holluar të mollës në lëkurë është si një ilaç shtëpiak për ekzemën, por një studim zbuloi se nuk bën ndonjë ndryshim në aspektin e pH, mbajtjes së lagështirës ose mikrobeve në lëkurë. Në fakt, disa që e kanë përdorur, kanë pasur kruajtje, djegie dhe kuqje. Pra, nuk rekomandohet për ekzemë, madje mund të përkeqësojë simptomat.

Është e sigurt?

Konsumimi i uthullës së mollës, edhe kur është i holluar, mund të ndërveprojë me medikamente të caktuara dhe mund të ulë nivelet e kaliumit në gjak. Është e rëndësishme të merrni rekomandimin e mjekut. E njëjta këshillë vlen edhe për përdorimin e uthullës së mollës për lëkurën.

Nëse dëshironi të përdorni uthull për të kontrolluar sheqerin në gjak, holloni një ose dy lugë gjelle në ujë dhe pijeni, por mos i kaloni dy deri në katër lugë në ditë.

Mbani mend, mos e pini të paholluar pasi mund të dëmtojë ezofagun. Një qasje më e shijshme është përdorimi i uthullës së mollës në gatim ose në pije freskuese.

EMISIONET