Shërbimi rus i burgjeve i dha një ultimatum të minutës së fundit kritikut të Kremlinit Alexei Navalny të hënën: Kthehu menjëherë nga Gjermania dhe paraqitu në zyrën e Moskës herët të martën në mëngjes, ose do të futesh në burg nëse vjen pas këtij afati.

Navalny, një nga kritikët kryesorë të Presidentit Vladimir Putin, u dërgua në Gjermani për trajtim në gusht pasi u sëmur gjatë një udhëtimi ajror në atë që Gjermania dhe vendet e tjera perëndimore thonë se ishte një përpjekje për ta vrarë me agjentin nervor Noviçok.

Rusia ka thënë se nuk ka parë asnjë provë që të tregojë se ai ishte helmuar dhe ka mohuar çdo përfshirje në incident.

Shërbimi Federal i Burgjeve (FSIN) akuzoi të hënën Navalny-n për shkeljen e rregullave të një dënimi me kusht që ai po vuan për një shkelje që daton në vitin 2014 dhe për shmangien e mbikëqyrjes së autoritetit të inspektimit penal të Rusisë.

Duke cituar një artikull në revistën mjekësore britanike The Lancet në lidhje me trajtimin e tij, thuhet se Navalny ka dalë nga spitali në Berlin më 20 shtator dhe se të gjitha simptomat e sëmundjes së tij ishin zhdukur në 12 tetor.

“I dënuari nuk po përmbush të gjitha detyrimet e vendosura mbi të nga gjykata dhe po i shmanget mbikëqyrjes së Inspektoratit Penal”, thuhet në deklaratë.

Navalny po vuan një dënim me kusht prej tre vjet e gjysmë për një rast vjedhjeje që ai thotë se ishte i motivuar politikisht. Periudha e dënimit skadon më 30 dhjetor.

Shërbimi i burgut tha në një deklaratë të hënën vonë se kishte thirrur Navalny-n për të raportuar pranë autoritetit të inspektimit dhe se dënimi i tij me kusht mund të kthehej në burg të vërtetë nëse shkeljet e tij të dyshuara provoheshin të ishin të vërteta.

Shërbimi i burgut nuk përmendi asnjë afat, por Navalny postoi një foto të një mesazhi dërguar avokatit të tij ku thuhet se ai kishte kohë deri në orën 09:00 të martën për t’u kthyer dhe të paraqitej në një zyrë në Moskë.

Zëdhënësja e tij, Kira Yarmysh, tha në Twitter, se ishte e pamundur që Navalny të kthehej në kohë, pasi është akoma duke u mëkëmbur pas helmimit dhe akuzoi shërbimin e burgut se kishte vepruar me urdhra nga Kremlini.

“Nuk ka asnjë mënyrë që ai të paraqitet nesër në Inspektoratin Penal të Moskës. Por a i intereson vërtet FSN-së të jetë e arsyeshme? Atyre u është dhënë urdhër dhe ata po e zbatojnë,” shkroi ajo.

Kremlini ka thënë se Navalny është i lirë të kthehet në Rusi në çdo kohë si çdo shtetas tjetër rus.