Rëndohet bilanci në Kosovë: 13 viktima dhe 171 raste të reja me Covid-19
Instituti Kombëtar i Shëndetit Publik në Kosovë, ka njoftuar se brenda 24 orëve janë regjistruar edhe 13 viktima, duke e çuar numrin total të të vdekurve me koronavirus në 354.
Ndërkohë, janë regjistruar edhe 171 raste të reja me koronavirus, pas marrjes së 463 mostrave.
Sipas të dhënave të këtij Instituti, po në 24 orët e fundit, janë regjistruar edhe 190 raste që kanë mposhtur virusin, derisa raste aktive aktualisht janë 3,988.
Prej 13 marsit, kur janë regjistruar rastet e para me koronavirus në Kosovë, autoritetet shëndetësore kanë raportuar për 10,590 të prekur nga sëmundja Covid-19, që shkakton koronavirusi.
Disa laboratorë në Prishtinë, të licencuar për teste serologjike për koronavirus, kanë nisur punën duke njoftuar se çmimet variojnë nga 25 deri në 50 euro, varësisht nga numri i testeve për antitrupa.