Për përballimin e situatës pandemike, në të gjithë vendin do të jenë edhe 5 spitale rajonale që do të vendosen në dispozicion të të prekurve me covid.

Lajmin e ka bërë të ditur ministrja e Shëndetësisë Ogerta Manastirliu sot gjatë inspektimeve në spitalin e Vlorës nga ku  deklaroi se ai do të jetë i pari që do të përfshihet në strukturën e trajtimit të të prekurve me covid.

Ogerta Manastirliu: “Spitali rajonal i Vlorës është pjesë e skenarit të parë për përfshirjen e spitaleve rajonale në trajtimin e të sëmurëve me Covid. Në skenarin e përfshirjes së 5 spitaleve të para, spitali i Durrësit, spitali i Vlorës, spitali i Shkodrës, spitali i Elbasanit dhe Korçës kemi mundësuar rritjen e kapaciteteve dhe vendosjen e pavioneve të veçantë për trajtimin e të sëmurëve në momentin që do të kemi një ezaurim të kapaciteteve 550 shtretër”

Ndërsa kryeministri Edi Rama iu përgjigj kritikave të opozitës dhe të presidentit për numrin e ulët të tamponëve.

Rama tha se qeveria ka pasur mundësi të shtoj numrin e tyre në mars, por kjo nuk i është kërkuar nga komiteti i ekspertëve.

“Po të ishte puna për të pasur më shumë teste do të ishin marrë më shumë por nuk na është kërkuar kjo nga komiteti dhe sot debate që po bëhet në shumë shtete është se kemi bërë shumë teste por nuk na është ndalur zinxhiri i infeksionit”

Spitali i Vlorës ka në dispozicion të të prekurve me covid, 80 vende ndërsa në reanimacion janë 14 shtretër.

Spitali rajonal i Vlorës do të jetë strukturë i cili do të vihet në dispozicion për të gjithë zonën e jugut.