Irani synon ta pasurojë uraniumin deri në 20 për qind
Nga OraNews Përditësimi i fundit 2 Janar 2021, 13:14
Irani planifikon të pasurojë vetitë radioaktive të uraniumit në shkelje të marrëveshjes ndërkombëtare antibërthamore të pesë viteve më parë.
Teherani njoftoi agjencinë e OKB-së për Energjinë Atomike se do të nisë të shumëfishojë sasinë e uraniumit me veti të larta eksplozive nga 4 në 20 për qind.
Sasia pretendohet se do të shfrytëzohet për qëllime studimi në reaktorë të nëndheshëm, kur më herët ishte zotuar se uraniumi i pastër nuk do të pasurohej më shumë se 4 për qind.
Vendimi i republikës islamike vjen si kundërpërgjigje ndaj sanksioneve amerikane por edhe ndaj vrasjes së kryeshkencëtarit që mendohet se po ideonte programin atomik të vendit.
Irani thotë se atentati ndaj Mohsen Fakrizadehut u krye nga Izraeli me shërbimin e vet informativ.
Marrëveshja e 2015-ës e lidhur mes SHBA-së, Iranit, Kinës, Francës, Gjermanisë, Rusisë dhe Britanisë parashikon heqjen e sanksioneve në këmbim të kufizimit të programit atomik.
SHBA-ja u largua prej saj në 2018-n me arsyen se Teherani nuk po i përmbahej zotimeve.
Edhe Gjermania tani mendon se pakti i vjetër duhet ndryshuar për të limituar, ndër të tjera, edhe programin iranian për raketat balistike.
Qëndrimet për rishikimin e marrëveshjes i ka hedhur poshtë Teherani, duke theksuar se nuk ka hapësira për rinegocimin e traktatit të shkuar.
