Malaj: Ekonomia sfida më e madhe e qeverisë “Rama”, auditimi nga KLSH

Një program i detajuar qeverisës për ta çuar vendin drejt rritjes ekonomike do të jetë sfida më e madhe e qeverisë Rama, e cila pritet të mandatohet në shtator. Ish-ministëri i Financave dhe deputet i legjislaturës së shkuar,zoti Arben Malaj, deklaroi në RTV Ora News se financat e vendit janë tepër delikate, por kjo nuk përjashton mundësië që kjo qeveri të jetë e suksesshme. Ndërsa foli për instrumentët e domosdoshëm për të çuar përpara këtë objektiv, Malaj tha se opsioni më optimal është që qeveria të njohë borxhet ndaj biznesit, duke i bërë ato pjesë të një buxheti afatmesëm.“Mazhoranca aktuale u testua në një votim elektoral, qeveria do ketë kohën e nevojshme për startuar, çdo investim do bëhet nga rezultatet konkrete. Mazhoranca në ikje duhet të marrë parasysh sfidat që ka vendi, ka angazhime premtuese nga ndërkombëtarët për marrjen e statusit në shtator, andaj agresiviteti pozitë-opozitë nuk duhet të cënojë vendin. Qeveria vjen në një moment të vështirë ekonomik. Rritja ekonomike do instrumentat e saj, të ketë para që qarkullojnë më shpejt. Qeveria duhet të ketë politika financiare për të hedhur në treg, mundësia më e mirë është sektori privat, do mund ti jepte një frymëmarrje ekonomisë. Situata është e vështirë, por është mundësi që qeveria e re të jetë më e qartë për atë që do bëjë. Marrëdhëniet me biznesin privat duhen përmirësuar. Opsionet janë të shumta, e para të bllokohen shpenzimet për të ruajtur deficitin por duhet përjashtuar sepse do sillte pasoja në shërbime, infrastrukturë. Momenti i dytë është që shpenzimet të bëhen por mos të paguhen, por kjo do thellonte borxhin. Mundësia tjetër është që borxhet të njihen dhe të bëhen pjesë e një buxheti afatmesëm dhe kjo është mënyra më e mirë që duhet të zbatohet. Nëse nisim nga reformat dokumenti më i mirë është programi i qeverisë, i cili do miratohet në parlament. Dokumentat lënë të kuptohet mbi vizionin e qeverisë. Gjeja e parë është reforma kushtetuese, administrative, rregullat fiskalë. Mundësia për sukses është më e plotë, por gjithnjë varet nga kapacitetet, transparenca” tha ai.

Kryefjala e premtimeve të PS përgjatë gjithë fushatës elektorale për heqje të taksave për biznesin e vogël sipas Malaj do jetë e vështirë, gati e pamundur për tu konkretizuar, pasi sipas tij mund të hiqet një taksë e caktuar, por ka një kufi ku shpenzimet duhen kufizuar.

“Qeveria do gjendet përballë presioneve për borxhin. Por kjo do ketë një shtrirje në kohë, nëse duam të vendosim rregull duhet të shohim cilat nga shpenzimet janë joefektive. Do duhet kohë e nevojshme, mund të hiqet një taksë e caktuar, por të ardhurat duhet mbledhur. Ka një kufi që shpenzimet duhen kufizuar” nënvizoi Malaj.

Deputeti Malaj u shpreh kundër idesë së Ramës për auditim ndërkombëtar, pasi sipas tij pasqyrimi për të dhënat në buxhet është e përcaktuar në Kushtetutë dhe organi competent për ta bërë diçka të tillë është KLSH.

“Vendi duhet të përballojë sfidat duke investuar në kapitalin e saj. Mund të ketë auditim ndërkombëtar, eksperiencat ndërkombëtare e përdorin, por për situata të caktuara. Sa i përket të dhënave në buxhet, janë një element që është përcaktuar në Kushtetutë, e ka KLSH. Kur flasim për auditim ndërkombëtar ëhstë e nevojshme të dimë për cfarë objekti do ta marrim dhe sa do jetë kostoja dhe relatisht është e vështirë. E njëjta gjë vlen dhe për INSTAT. Duhet të kuptojmë se sfidat e vendit tonë duhet të shtyhen drejt  një investim te kapitalit njerëzor në vend. Sfidë e madhe psh është  përzgjedhja e administratës publike” shtoi më tej ai.

Dhe pse është kthyer gati gati në mani politikbërja e aktorëve politikë përmes rrjeteve sociale, Malaj shprehet se fb apo rrjetet e tjera nuk sjellin rezultatet e duhura për çdo çështje.Në këtë mënyrë debatin e hapur nga Ministrat e rinj në rrjete e vlerëson si jo shumë të goditur, pasi sipas tij strategjitë afatgjata duhet të hartohen nga ekspertët.

“Përdorimi i rrjeteve sociale ka avantazhet e saj, por qëllimi që përdoret është jo i barabartë apo i dobishëm. Një nga problemet kryesore që do ketë vendi është transparenca ndaj publikut dhe baza mbi të cilat do të bëhen reformat. Përdorimi i fb për gjithcka nuk sjell rezultatet e duhura, duhen konsultime me ekspertët më të mirë për  fusha të ndryshme në vend” deklaroi Malaj.

I pyetur rreth kompozimit të kabinetit qeveritar të majtë, Malaj tha se harmonizimi i përvojave me eksperiencën do të ishte një garanci më e madhe, por gjithcka do të varet nga mentaliteti dhe puna në ekip.

“Kolegët e PS janë atje, janë në forume, do jenë në grupin parlamentar. Janë ata që kanë detyrimin që të analizojnë për opsionet më të mira për të arritur sukses. Një harmonizim i përvojave me eksperiencën është një garanci më e madhe sigurisht. Por me rëndësi është që procesi brenda qeverisë në terësinë e saj në asnjë rast të mos nënvlerësojnë detyrimet ndaj vendit të saj në mënyrë që rritja eklonomike të demostrojë prosperitet për një pjsë sa më të madhe të popullësisë. Gjithcka do varet nga mentalitetit dhe puna në ekip, nuk duhen paragjykuar. Ministrat duhet të ndihen të përgjegjshëm për politikat sektoriale”theksoi  deputeti Malaj.