Akuza e LDK-së/ Vëllai i Kurtit në zyrën e tregtimit të energjisë
Nga OraNews Përditësimi i fundit 21 Prill 2026, 13:19
Deputetja e Lidhjes Demokratike të Kosovës (LDK), Janina Ymeri, ka deklaruar se importi i energjisë elektrike ka arritur nivele alarmante dhe të paparashikueshme, duke ia atribuar këtë rënie prodhimit vendor dhe mungesës së thëngjillit.
Sipas saj, kostoja totale e importit tashmë ka kaluar shifrën prej 1 miliard eurosh. Ymeri sfidoi narrativën zyrtare se rritja e çmimeve është pasojë e pandemisë, duke argumentuar se shkaqet kryesore janë të brendshme.
“Rritja e çmimit po mbahet në nivele të paparashikueshme për shkak të rënies së blloqeve energjetike dhe mungesës së planifikimit të prodhimit nga ana e KEK-ut,” theksoi ajo.
Deputetja e LDK-së akuzoi ashpër qeverinë për keqmenaxhim, duke thënë se pushteti aktual e ka “gllabëruar” tërësisht sektorin energjetik. Për të mbështetur pretendimin e saj për politizim dhe konflikt interesi, Ymeri përfundoi me një pyetje retorike:
“Si mund të flasim për një sektor të pavarur kur në të njëjtën zyrë ku bëhet tregtia dhe bilanci i energjisë elektrike punon vetë vëllai i kryeministrit?”
