“Ndryshime në trup dhe mendje nga frekuenca e Tokës”/ Sa qëndrojnë këto pretendime dhe çfarë dihet realisht

Nga OraNews Përditësimi i fundit 20 Prill 2026, 15:19

Në rrjete sociale po qarkullon një informacion që lidh të ashtuquajturën Rezonanca Schumann me ndryshime në trupin dhe përditshmërinë e njerëzve, si pagjumësi, lodhje apo ndjesi të pazakonta në trup.

Sipas këtyre postimeve, frekuenca e Tokës është rritur ndjeshëm vitet e fundit dhe kjo po ndikon në mënyrën si njerëzit flenë, ndihen apo edhe si e perceptojnë kohën.

Madje pretendohet se kjo rritje ka arritur nivele të larta dhe po sjell ndryshime të mëdha fizike dhe emocionale.

Por shpjegimi shkencor është më i thjeshtë dhe më i kufizuar.

Rezonanca Schumann është një fenomen natyror që lidhet me valët elektromagnetike në atmosferë, kryesisht e shkaktuar nga rrufetë.

Vlera e saj kryesore qëndron rreth 7.8 Hz dhe mund të ketë luhatje të vogla, por nuk ka prova të konfirmuara që ajo është rritur në mënyrë drastike apo se ka ndikim të drejtpërdrejtë te shëndeti i njerëzve.

Ekspertët sqarojnë se simptomat si lodhja, stresi apo çrregullimet e gjumit zakonisht lidhen me faktorë të përditshëm si ritmi i jetesës, përdorimi i teknologjisë, ankthi apo mungesa e pushimit, dhe jo me ndryshime të frekuencave të Tokës.

Edhe ideja që “koha po përshpejtohet” nuk mbështetet nga fakte shkencore. Ndjesia që ditët kalojnë më shpejt shpesh lidhet me mënyrën si funksionon truri dhe me ritmin e ngarkuar të jetës moderne.

Në përfundim, informacionet që lidhin rezonancën Schumann me ndryshime të mëdha në trupin e njeriut mbeten të pakonfirmuara. Studiuesit këshillojnë që këto pretendime të shihen me kujdes dhe të mbështeten në burime të besueshme për çështje që lidhen me shëndetin dhe shkencën.