MODA DHE STILI I NJË MBRETËRESHE! Hapet ekspozita e me 200 veshjet e Elisabetës së II-të
Nga Lili Saraçi Përditësimi i fundit 10 Prill 2026, 15:33
Një ekspozitë e jashtëzakonshme me 200 veshje të Mbretëreshës Elisabeta 2 është hapur në Buckingham Palace, me rastin e 100-vjetorit të lindjes së sovranes britanike. Materiali ju prezanton me ekspozitën “Jeta e saj me stil”
Nga princesha në mbretëreshë, nga stili jashtë detyrës, deri te veshja për skenën globale e për raste të rëndësishme në historinë e Britanisë, këto janë 200 vjeshjet që e shoqëruan mbretëreshën Elisabeta II gjatë rrugëtimit të jetës së saj.
Këto fustane qëndrojnë të ekspozuara në Buckingham Palace, me rastin e 100-vjetorit të lindjes së sovranes britanike.
Koleksioni është i pasur me ngjyra të shumta, emblemë e dallueshme e personalitetit të saj që në rininë e hershme, por jo vetëm; komunikonin mesazhe diplomatike, solidariteti, simbolika.
Ngjyrat zgjidheshin në bazë të mesazheve që duhej të transmetonin, me një përdorim strategjik të së gjelbrës për të shprehur mbështetje.
Ndërsa ngjyra e zezë u vesh nga Mbretëresha Elisabeta vetëm në 2 raste gjatë gjithë jetës së saj, në solemnitet të fortë, në rastin e ceremonisë mortore në përcjellje të princeshës Diana dhe të Princit të Edinburgh, Philip, bashkëshorti i saj.
Stili i saj, i njohur si Stil Britanik, ka influencuar gjenerata stilistësh dhe e ktheu look-un e saj ndër më të njohurit dhe të studiuarit të botës për dekada të tëra.
Në këtë ekspozitë nuk mungojnë fustanet përrallore të ballove apo rasteve të tjera të mëdha mbretërore, me ndikim botëror, të pasur me detaje të jashtëzakonshme, të denja të një mbretëreshe unike.
Edhe fustani i saj i nusërisë, i realizuar në vitin 1947, ishte një triumf mëndafshi, me 10 mijë perla e kristale të qëndisura, simbol i rilindjes pas Luftës së II Botërore.
Një koleksion i jashtëzakonshëm, me veshjet e saj ndër vite, duke nisur edhe nga një fustan i saj që e veshi në moshën 8-vjeçare, me rastin e celebrimit të martesës së xhaxhait të saj, Dukës së Kentit.
