Salvini: Shqipëria dhe Serbia mund të avancojnë drejt BE-së “që nesër në mëngjes”, Ukraina në një kategori tjetër
Nga Alba Kepi Përditësimi i fundit 9 Prill 2026, 14:02
Numri dy i qeverisë italiane dhe njëherësh lider i Lega-s, Matteo Salvini, ka zhvilluar sot një konferencë për shtyp me gazetarët e huaj në Itali. Deklaratat e tij vijnë në një moment politik të ndjeshëm për ekzekutivin e kryesuar nga Giorgia Meloni, pas një klime tensioni të brendshëm dhe debatit të vazhdueshëm politik në vend.
Konferenca u mbajt në një periudhë të ngarkuar për qeverinë italiane, pas disa dorëheqjeve të rëndësishme dhe pasojave politike të referendumit mbi drejtësinë, ndërsa opozita vijon me akuza të përditshme ndaj shumicës. Në sfond qëndron edhe situata e pasigurt gjeopolitike ndërkombëtare, përfshirë luftën në Ukrainë dhe tensionet në rajone të tjera të Evropës.
Debati për zgjerimin e Bashkimit Evropian
Një nga momentet kryesore të konferencës ishte përgjigjja e Salvinit ndaj pyetjes së gazetares Alba Kepi mbi zgjerimin e Bashkimit Evropian dhe vendet që presin anëtarësimin, përfshirë Ukrainën, Shqipërinë, Serbinë, Bosnjën dhe Hercegovinën dhe Moldavinë.
Salvini theksoi se këto vende nuk mund të trajtohen si një grup i vetëm, pasi sipas tij kanë histori dhe procese integrimi shumë të ndryshme.
“Serbia dhe Shqipëria janë në një fazë shumë më të avancuar, kështu që mund të flitet për to edhe që nesër në mëngjes. Ukraina, për shkak të konfliktit, ka një strukturë tjetër sociale dhe juridike,” u shpreh ai, duke nënvizuar se situata e saj është krejt e ndryshme nga vendet e Ballkanit Perëndimor.
Qasje kritike ndaj zgjerimit të shpejtë të BE-së
Duke folur më gjerë për të ardhmen e Bashkimit Evropian, Salvini kritikoi ritmin aktual të zgjerimit dhe mënyrën e funksionimit të institucioneve në Bruksel. Sipas tij, Evropa ka funksionuar më mirë në kohën e Komunitetit Ekonomik Evropian, kur shtetet kishin më shumë autonomi dhe më pak detyrime të centralizuara.
“Sot flitet për një zgjerim të shpejtë, por kjo është e kotë. Evropa duhet të forcohet duke i lënë shtetet të investojnë në veçoritë e tyre, pa i detyruar,” tha ai.
Ai shtoi gjithashtu se disa politika të reja evropiane, si ato që lidhen me transportin detar dhe taksat e reja, rrezikojnë sipas tij të dëmtojnë konkurrueshmërinë ekonomike të vendeve anëtare.
Kundërshtim i idesë së ushtrisë evropiane
Në deklaratat e tij, Salvini u ndal edhe tek ideja e një ushtrie të përbashkët evropiane, të cilën e hodhi poshtë kategorikisht.
“Absolutisht jo. Kush e dërgon këtë ushtri në luftë? Kujt i përkasin trupat?” tha ai, duke theksuar se siguria dhe vendimmarrja ushtarake duhet të mbeten në nivel kombëtar.
Në përfundim të qëndrimeve të tij, Salvini theksoi një qasje më fleksibile ndaj Ballkanit Perëndimor, duke i cilësuar Shqipërinë dhe Serbinë si “popuj miq e vëllezër”, ndërsa përsëriti se Bashkimi Evropian nuk duhet të kthehet në një “frenë” për zhvillimin e shteteve anëtare dhe kandidate.
Deklaratat e tij pritet të nxisin debat në Bruksel dhe në vendet kandidate, veçanërisht në kontekstin e procesit të zgjerimit të BE-së dhe ritmit të integrimit të Ballkanit Perëndimor.
