RRJET SPIUNAZHI IRANIAN! Arrestime në Londër për spiunazh, dyshime edhe për ekzekutim gjenerali

Nga OraNews Përditësimi i fundit 6 Mars 2026, 15:07

Dhjetë persona janë arrestuar në Londër nën dyshimin për spiunazh në favor të Iranit, ndërsa autoritetet britanike po hetojnë një rrjet të dyshuar që survejonte komunitetin hebre në kryeqytetin britanik. Në të njëjtën kohë, raportime flasin për ekzekutimin e një gjenerali të Gardës Revolucionare iraniane, i dyshuar për bashkëpunim me shërbimin sekret izraelit Mossad.

Autoritetet britanike kanë arrestuar dhjetë persona në Londër, të dyshuar për përfshirje në aktivitete spiunazhi në favor të Iranit.

Sipas Policisë Metropolitane të Londrës, katër prej tyre dyshohet se kanë ndihmuar shërbimin e inteligjencës së jashtme iraniane dhe se kanë shkelur Aktin e Sigurisë Kombëtare të Britanisë.

Të arrestuarit përfshijnë një shtetas iranian dhe tre persona me shtetësi të dyfishtë britanike dhe iraniane. Ata dyshohet se kanë mbikëqyrur dhe mbledhur informacione për komunitetin hebre në Londër.

Autoritetet britanike theksojnë se operacioni është pjesë e një hetimi të gjatë për të zbuluar aktivitetet e dyshuara të shërbimeve të huaja të inteligjencës në territorin britanik.

Drejtuesja e njësisë kundër terrorizmit në Londër deklaroi se arrestimet janë rezultat i përpjekjeve të vazhdueshme për të ndërprerë aktivitetet që konsiderohen kërcënim për sigurinë kombëtare.

Ndërkohë, policia u bëri thirrje qytetarëve, veçanërisht komunitetit hebre, të qëndrojnë vigjilentë dhe të raportojnë çdo aktivitet të dyshimtë.

Në të njëjtën kohë, zhvillime të tjera të bujshme raportohen nga Lindja e Mesme.

Mediat ndërkombëtare raportojnë se gjenerali iranian Esmail Qaani, komandant i njësisë elitare Quds Force të Gardës Revolucionare, dyshohet se është ekzekutuar pasi u akuzua për spiunazh në favor të shërbimit sekret izraelit Mossad.

Megjithatë, deri më tani nuk ka konfirmim zyrtar nga autoritetet iraniane për këto raportime.

Qaani konsiderohej një nga figurat më të rëndësishme ushtarake të Iranit dhe drejtonte operacionet e Gardës Revolucionare jashtë vendit.

Zhdukjet e tij të herëpashershme nga skena publike gjatë viteve të fundit kishin nxitur më parë spekulime për fatin dhe rolin e tij brenda strukturave të sigurisë iraniane.

Ndërsa hetimet në Londër vijojnë, këto zhvillime po shtojnë tensionet dhe dyshimet për aktivitetet e rrjeteve të spiunazhit mes Iranit dhe kundërshtarëve të tij ndërkombëtarë.