Morgan Freeman merr masa ligjore për të ndaluar klonimin e zërit të tij nga Inteligjenca Artificiale
Nga OraNews Përditësimi i fundit 3 Mars 2026, 09:20
Aktori i njohur dhe fitues i Oscar-it, Morgan Freeman, po ndërmerr hapa ligjorë për të mbrojtur një nga asetet e tij më të çmuara: zërin. Freeman ka punësuar një ekip avokatësh për të ndaluar përdorimin e paautorizuar të timbrit të tij nga teknologjitë e Inteligjencës Artificiale, të cilat po përhapen me shpejtësi në industrinë e argëtimit.
Në një intervistë për CBS Mornings, Freeman u pyet drejtpërdrejt mbi fenomenin e klonimit të zërave të aktorëve me IA, dhe përgjigjja e tij ishte e shkurtër, por e qartë: “Kam punësuar avokatë.” Sipas tij, ekipi ligjor tashmë po angazhohet për të ndaluar çdo përdorim të paautorizuar të zërit të tij karakteristik, duke reflektuar shqetësimin në rritje mbi këtë çështje.
Freeman theksoi se zëri i tij nuk është thjesht një dhunti natyrore, por rezultat i përgatitjes profesionale. Ai ka studiuar vokal dhe recitim gjatë viteve, duke punuar për ta perfeksionuar teknikat e tij, dhe për këtë arsye e konsideron të papranueshme riprodhimin e tij pa leje.
Vendimi i Freeman vjen në një kohë kur përdorimi i Inteligjencës Artificiale për të klonuar zërat dhe imazhet e personazheve publikë ka ndezur debate të ashpra ligjore dhe etike. Çështjet mbi pronësinë, të drejtat artistike dhe identitetin personal po bëhen gjithnjë e më të diskutueshme në epokën digjitale.
