OKB shpreh shqetësim të thellë për Venezuelën/ Ndërhyrja ushtarake e SHBA-së shkel të drejtën ndërkombëtare

Nga OraNews Përditësimi i fundit 6 Janar 2026, 12:51

Komisioneri i Lartë i OKB-së për të Drejtat e Njeriut është thellësisht i shqetësuar për situatën në Venezuelë pas operacionit ushtarak të Shteteve të Bashkuara të Amerikës gjatë fundjavës. Është e qartë se operacioni minoi një parim themelor të së drejtës ndërkombëtare, që shtetet nuk duhet të kërcënojnë ose të përdorin forcë kundër integritetit territorial ose pavarësisë politike të asnjë shteti.

Mediat e huaja shkrujnë se, SHBA-të e kanë justifikuar ndërhyrjen e tyre me bazë në historikun e gjatë dhe të tmerrshëm të të drejtave të njeriut të Qeverisë Venezueliane, por llogaridhënia për shkeljet e të drejtave të njeriut nuk mund të arrihet me anë të ndërhyrjes ushtarake të njëanshme në shkelje të së drejtës ndërkombëtare. Populli i Venezuelës meriton llogaridhënie përmes një procesi të drejtë dhe të përqendruar te viktima.

Siç është bërë e qartë në raportimet e vazhdueshme të Zyrës së OKB-së për të Drejtat e Njeriut mbi përkeqësimin e vazhdueshëm të situatës në Venezuelë për rreth një dekadë, të drejtat e popullit venezuelian janë shkelur për një kohë shumë të gjatë. Kemi frikë se paqëndrueshmëria aktuale dhe militarizimi i mëtejshëm në vend që vjen si pasojë e ndërhyrjes së SHBA-së vetëm sa do ta përkeqësojnë situatën.

Gjendja e jashtëzakonshme e shpallur nga autoritetet venezueliane që hyri në fuqi të shtunën ngre shqetësime pasi autorizon kufizime në lëvizjen e lirë të njerëzve, sekuestrimin e pronës së nevojshme për mbrojtjen kombëtare dhe pezullimin e të drejtës për tubim dhe protestë, ndër masa të tjera.

Komisioneri i Lartë u bën thirrje SHBA-ve dhe autoriteteve venezueliane, si dhe bashkësisë ndërkombëtare, të sigurojnë respekt të plotë për të drejtën ndërkombëtare, përfshirë të drejtat e njeriut.

E ardhmja e Venezuelës duhet të përcaktohet vetëm nga populli venezuelian, me respekt të plotë për të drejtat e tyre njerëzore, duke përfshirë të drejtën për vetëvendosje dhe sovranitetin mbi jetën dhe burimet e tyre.