SHBA “LEHTËSON” ITALINË/ Hiqen tarifat 107% për 13 produkte, mes tyre dhe makaronat
Nga OraNews Përditësimi i fundit 2 Janar 2026, 13:56
Departamenti i Tregtisë i SHBA-së ka vendosur të ulë ndjeshëm tarifat për makaronat italiane, duke i çuar nga 107% në 24-29%. Vendimi ndjek shqetësimet e kompanive italiane dhe hetimin antidumping të nisur vitin e kaluar. Tarifat e reja do të shpallen më 12 mars dhe prekin 13 prodhues kryesorë italianë të makaronave.
Një lajm i mirë për prodhuesit italianë të makaronave vjen nga Shteteve të Bashkuara të amerkisës
Departamenti i Tregtisë në Uashington ka rishikuar ndjeshëm normat e parapara të tarifave antidumping për një grup prodhuesish italianë të makaronave, duke i ulur nga niveli fillestar 107% në një interval mes 24% dhe 29% për 13 kompani eksportuese.
Vendimi vjen pas hetimit të nisur nga kompanitë amerikane 8th Avenue Food & Provisions dhe Winland Foods, të cilat kishin pretenduar se disa prodhues italianë kishin shitur produkte nën çmimin normal të tregut në SHBA.
Pas procesit verifikues dhe bashkëpunimit teknik me palët e përfshira, autoritetet amerikane kanë përcaktuar një nivel të ri tarifash të konsideruar më proporcional me gjetjet e hetimit.
Në një reagim zyrtar, Ministria italiane e Punëve të Jashtme e ka përshëndetur rregullimin e normave, duke e cilësuar atë si një shenjë vlerësimi për gatishmërinë e kompanive italiane për të bashkëpunuar në procesin administrativ dhe për të siguruar transparencë në praktikat tregtare.
Tarifat e reja, të cilat pritet të shpallen zyrtarisht më 12 mars, u japin lehtësim të drejtpërdrejtë eksportuesve italianë të makaronave, duke reduktuar barrën fiskale mbi produktet e eksportuara në tregun amerikan.
Sipas vlerësimeve të para, ulja e normave ndihmon gjithashtu në shmangien e rritjeve të forta të çmimeve për konsumatorët në SHBA, të cilat mund të kishin rezultuar nga aplikimi i nivelit fillestar 107%. Ruajtja e aksesit të produkteve tradicionale italiane në tregun amerikan shihet si element i rëndësishëm për stabilitetin e zinxhirit tregtar mes dy vendeve, ndërkohë që pritet që ndikimi i plotë ekonomik i këtij rishikimi të vlerësohet gjatë muajve në vijim, pas hyrjes në fuqi të tarifave të reja.
